सप्तेश्वर बाल एकता क्लबले मनायो ६० औँ बाल दिवस

भदौ २९, सोलुखुम्बु । खोटाङको केपिलासगढी गाउँपालिका वडा नम्बर ५ स्थित थर्पु डाँडा माध्यमिक विद्यालयमा ६० औँ बाल दिवस भव्यताका साथ मनाइएको छ । सप्तेश्वर बाल एकता क्लबको आयोजनामा शनिबार विभिन्न कार्यक्रम गरी ६० औँ बाल दिवस मनाइएको हो ।

बालबालिकामा लगानी : सुनिश्चित भविष्यको थालनी भन्ने मुल नाराका साथ सप्तेश्वर बाल एकता क्लबका अध्यक्ष श्रीसुर्य राईको अध्यक्षता तथा केपिलासगढी गाउँपालिका वडा नम्बर ५ हिमाल भक्त राइको प्रमुख आतिथ्यतामा विविध कार्यक्रम आयोजना गरी मनाइएको विद्यालयले जनाएको छ ।

दिवसको अवसरमा वतृत्वकला, हाजिरी जवाफ, भित्र बाहिर, बेलुन फुटाई लगायतका प्रतियोगिताहरु सञ्चालन गरिएको थर्पु डाँडा माध्यमिक विद्यालयका प्र.अ  ग्यानु बहादुर राईले जानकारी दिनुभयो । संविधानले बालबालिकाको हकलाई मौलिक हकका रूपमा व्यवस्था गरी बाल बचाउ, बाल संरक्षण, बाल विकास र बाल सहभागिता जस्ता विषय समेटी सर्वाङ्गीण विकासको प्रत्याभूत गरेको छ । बाल दिवस मनाउनका लागि केपिलासगढी गाउँपालिका र वडा कार्यालयले १०। १० हजार रुपैंया आर्थिक सहयोग गर्नुभएको छ ।