२० औं केदार स्कुल हत्याकाण्ड तथा २२ औं कोमल स्मृति दिवस सम्पन्न

भदौ २९, सोलुखुम्बु ।  २० औं केदार स्कुल हत्याकाण्ड स्मृति दिवस एवं २२ औं शहीद कोमल स्मृति दिवस आज सम्पन्न भएको छ । सोलुखुम्बुको शहिद कुसुम स्मृति प्रतिष्ठानको केन्दिय्र कार्यालय, नेचासल्यान गाउँपालिका वडा नम्बर ३, राउत गाउँमा कार्यक्रम सम्पन्न गरियाे हाे ।

उक्त कार्यक्रम शहीद रमेश कटेल ’कोमल’ का दाई आदरणीय पुण्य प्रसाद कटेल ज्यूको प्रमुख आतिथ्यतामा सम्पन्न भएको हो । शहिद को सम्झनामा “दीप प्रज्वलन तथा श्रद्धाञ्जलि कार्यक्रम“ गरिएको थियो ।

केदार स्कुल ह्त्याकाण्डका रुपमा चर्चित यो घटना वि.सं. २०६१ भाद्र २९ गतेका दिन नेचासल्यान गाउँपालिका-४ स्थित केदार मा.वि.को प्राङ्गणमा अखिल (क्रान्तिकारी) सोलुखुम्बुका तत्कालिन संयोजक भुपेन्द्र कार्की ’अजय’, सचिव उर्मिला राई ’क्रान्ति’, सदस्यहरु तिलकुमारी गिरी ’आस्था’ , आइकम राई ’रविन’ र पेम्बा शेर्पा सहित ५ जनाको विद्यालयको प्राङ्गण मै निर्मम हत्या भएको थियो ।

त्यसै गरी २०५९ असार १७ गते नेलेबाट गिरफ्तार गरी ३ महिना बढी सोलुखुम्बुको हिरासतमा राखि ओखलढुंगा हिरासत स्थान्तरण गर्ने क्रममा २०५९ भाद्र २९ गतेका दिन सोलुदुधकुण्ड-८ स्थित पत्तालेको थाले डाँडामा शहीद रमेश कट्टेल ’कोमल’ को निर्मम हत्या गरिएको थियो ।

दीप प्रज्वलन तथा श्रद्धाञ्जली कार्यक्रममा सहभागि हुदैँ नेचासल्यान गाउँपालिकाका नेताहरु साथै प्रतिष्ठानका पदाधिकारी, सदस्यहरु, विद्यार्थी नेतृ उर्मिला बांस्तोला लगायतले मन्तव्य राख्दै शहिदहरुलाई सम्झनु भयो ।

यस कार्यक्रममा शहीद परिवार, अखिल (क्रान्तिकारी), हिमाल दर्शन मा.वि. र केदार मा.वि. इकाई समितिका पदाधिकारी एवं सदस्यहरु शुभचिन्तकहरुको उपस्थिति रहेको रेडियो एभरेष्टका फिल्ड कोडिनेटर धन कुमार ढुङ्गेलले जानकारी दिनुभयो ।