लिखुपिकेमा बालदिवस विशेष कार्यक्रम, हाजिरजवाफ, वक्तृत्वकला र नृत्य आयोजना 

भदौ २९ सोलुखुम्बु । सोलुखुम्बुको लिखुपिके गाउँपालिकामा बाल दिवस विशेष कार्यक्रम सम्पन्न भएको छ । ६० औँ वाल दिवसको अवसरमा पालिकाको शिक्षा शाखाले आयोजना गरेको बाल दिवस विशृष कार्यक्रममा नृत्य, हाजिरजवाफ तथा वक्तृत्वकला प्रतियोगिताको आयोजना गरिएको हो ।

गाउँपालिका अध्यक्ष मिना कार्की बस्नेतको प्रमुख आतिथ्यमामा सम्पन्न कार्यक्रम गाउँपालिकाको केन्द्र चौलाखर्कमा सम्पन्न भएको थियो ।  बाल दिवसको अवसरमा आयोजना गरिएको कार्यक्रममा नृत्य तर्फको ११ टिमलाई पछाडि पार्दै हिमगङ्गा मावि प्रथम भएको छ ।  यस्तै द्वितीय स्थान बुद्ध मावि, तृतीय स्थान जनसेवा आवी र सान्त्वना बुढाकिन्जा आवीले स्थान हासिल गरेको छ ।

 यता हाजिरजवाफ प्रतियोगितामा ६ टिम सहभागी भएकोमा चन्द्रज्योति माविले प्रथम स्थान हासिल गरेको छ भने द्वितीय र तृतीय, सान्त्वना स्थान क्रमशः हिमगङ्गा मावि, बुद्ध मावि. र बुडाकिन्जा  आवीले हासिल गरेका छन ।  यस्तै वक्तृत्वकला प्रतियोगितामा सहभागी ६ जनालाई पछि पार्दै बुद्ध मावि प्रथम भएको छ भने द्धितीय, तृतीय र सान्त्वना स्थान क्रमशः हिमगङ्गा मावि, बुद्ध मावि, चन्द्रज्योति माविले हासिल गरेका छन ।

३ वटै विधाका प्रतियोगितामा प्रमुख ४ स्थान हासिल गर्ने टिमले समान ६ हजार, ४ हजार, २ हजार र १ हजार नगद सहित प्रमाणपत्र प्राप्त गरेका छन् ।  कार्यक्रममा गाउँपालिकाका उपाध्यक्ष ङवाङ् ल्हाक्पा शेर्पा र प्रमुख प्रशासकीय अधिकृत काजिमान राईको विशेष आतिथ्यता रहेको थियो । बालबालिकामा लगानी ः सुनिश्चित भविष्यको थालनी भन्ने मूल नाराका साथ आयोजित कार्यक्रममा गाउँपालिकाका विभिन्न वडाका अध्यक्षहरू, गाउँपालिकाका शाखाका प्रमुख तथा कर्मचारीहरू, गाउँपालिकाका सबै विद्यालयका प्रधानाध्यापक तथा शिक्षक एवं प्रतिनिधि, विद्यार्थी एवं अभिभावकहरूको उपस्थिति रहेको थियो ।