ओखलढुंगाको खिजिदेम्बाले ग¥यो सार्वजनिक सुनुवाई, पुँजीगत खर्च ३५ प्रतिशत

२२ बैशाख, ओखलढुंगा । ओखल्ढुंगाको दुर्गम क्षेत्रमा अवस्थित खिजिदेम्बा गाउँपालिकाले तेश्रो त्रैमासिकको सार्वजनिक सुनुवाई गरि प्रगति विवरण सार्वजनिक गरेको छ । शनिबार खिजिफलाटे बजारमा आम नागरिकका विचमा सार्वजनिक सुनुवाई गरि पालिकाको समग्र विकास निर्माण र सेवा प्रवाहको अवस्थाका बारेमा जानकारी गराईएको हो । सो अवसरमा भौतिक तथा आर्थिक प्रगतिहरु सार्वजनिक गरिएको छ भने हालसम्म पुजिगत तर्फ ३५ दशमलव ७४ प्रतिशत र चालु तर्फ ५८.५४ प्रतिशत खर्चको विवरण सार्वजनिक गरिएको छ । पालिकाका सबै सरोकारवाला उपस्थित कार्यक्रममा पालिका अध्यक्ष, उपाध्यक्ष, ९ वटै वडाका अध्यक्ष साथै प्रमुख प्रशासकिय अधिकृत र विषयगत शाखा प्रमुखहरुले उठेको प्रश्नको जफाब दिएका थिए ।

आम नागरिकले उठाएको प्रश्नको संबोधन गर्दै पालिका अध्यक्ष गम्बु शेर्पाले आफु फरक र नविन सोचका साथ काममा लागेको भन्दै पारदर्शिता र शुसासन आफ्नो प्राथमिक्तामा रहेको बताउनु भयो । नेतृत्वमा आएको २ बर्षमा विकास निर्माणका आधारभुत कुरामा फड्को मारेका भन्दै अब बाँकी ३ बर्षमा पालिकाको मुहार फेर्न ईमान्दार प्रयास गर्ने बताउनु भयो । पालिकामा कृषि र युवा उद्यमशिलतामा नतिजा आउने गरि काम गर्ने धारणा राख्नु भयो । पालिकामा आयातित मदिरालाई निषेध गरिएको भन्दा स्थानीयलाई नै ब्राण्डिङ गर्ने योजना अघि सारेको वहाँको भनाई छ । २ बर्षको अवधिमा कानुन तथा कार्यविधिहरु निर्माण गरिसकेको भन्दा अब जनताको मागमा आधारित कामहरुलाई प्राथमिक्तामा राखेको वहाँको भनाई छ ।

कार्यक्रममा पालिका उपाध्यक्ष सुशिला तामाङले न्यायनिरुपण र अनुमगनको क्षेत्रमा आफु सक्रिय रहेको भन्दै जनगुनासो नआउने गरि कार्यसम्पादन गरिरहेको स्पष्ट पार्नु भयो । प्रमुख प्रशासकिय अधिकृत रमेश सुनुवारले बजेट तथा कार्यक्रमहरुको कार्यप्रगति प्रस्तुत गर्नु भयो । सो क्रममा पालिकाको कुल बजेट ४९ करोड ६१ लाख ५२ हजार ८ सय ४४ मध्ये २५ करोड ९८ लाख ४३ हजार ९ सय ४६ रुपैँया खर्च भईसकेको जानकारी दिनुभयो । सार्वजनिक सुनुवाईमा ९ वटै वडाका वडा अध्यक्षहरुले आ–आफ्नो वडाको कार्यप्रगति प्रस्तुत गरेका छन् । जनताहरुले गरेको प्रश्नको उत्तर दिँदै वडाअध्यक्षहरुले सामुहिक रुपमा नै पालिकाको बृहत्तर विकासमा लागि परेको बताएका छन् ।