सोलुखुम्बुका ४ वटा सामुदायिक वनमा आगलागी जारी  

सोलुखुम्बु, बैशाख २२ । सोलुखुम्बुका विभिन्न ४ स्थानमा आगलागी भइरहेको छ ।  जिल्ला प्रहरी कार्यालय सोलुखुम्बुका अनुसार जिल्लाका विभिन्न स्थानका सामुदायिक तथा निजि वन जङ्गलहरुमा आगलागी भइरहेको हो । प्रहरीका अनुसार थुलुङ दूधकोशी गाउँपालिका वडा नम्बर १ स्थित कुर्लुङ सामुदायिक वनमा आगलागी भइरहेको छ ।  उक्त सामुदायिक बनमा गत २१ गते देखी आगलागी सुरु भएको थियो । यस्तै जिल्लाको थुलुङ दूधकोशी गाउँपालिका वडा नम्बर ८ स्थित सेसर्दु सामुदायिक वनमा पनि आगलागी भइरहेको छ ।  

उक्त सामुदायिक वनमा गत २० गते सुरु भएको आगलागी हाल सम्म नियन्त्रणमा आउन नसकेको जिल्ला प्रहरी कार्यालयका रामचन्द्र शाहले बताउनुभयो । यस्तै सोही गाउँपालिका वडा नम्बर ६ देरापु स्थित निजी वनबाट सुरु भएको आगलागी पनि हाल सम्म नियन्त्रणमा आउन सकेको छैन ।  

प्रहरीका अनुसार उक्त वनमा हिजो २२ गते आगलागी सुरु भएको थियो भने त्यसलाई नियन्त्रणमा लिने कार्य भइरहेको जनाइएको छ । यता सोलुखुम्बुको थुलुङ दूधकोशी गा.पा. २ पितकुल स्थित वातिम सामुदायिक वनमा पनि हिजो २२ गतेदेखि आगलागी भइरहेको छ । उक्त सामुदायिक बनमा लागेको डढेलोले तत्काल घर बस्तीहरू भेट्ने सम्भावना नरहेको पनि प्रहरीले जनाएको छ । अन्य जङ्गलमा भएको आगलागी नियन्त्रणमा रहेको जनाइएको छ ।