सगरमाथामा फेक रेस्क्यु, “पर्यटन व्यवसायका लागी क्यान्सर”

साेलुखुम्बु, बैशाख २४ । सगरमाथामा फेक रेस्क्यु गरेर पर्यटक ठगिएको भन्दै नाम्चे युवा समाजले चिन्ता व्यक्त गरेको छ । एक सन्देश पत्र जारी गर्दै सगरमाथा क्षेत्रमा फेक रेस्क्यु गरेर पर्यटकलाई ठग्ने कार्य “पर्यटन व्यवसायीका लागी क्यान्सर” भन्दै  यसो नगर्नका लागी सन्देश फैलाउन युवा समाजले सन्देश पत्र मार्फत भनेको हो ।  विश्वमा पहिचान बनाएको सगरमाथामा फेक रेस्क्युका माध्यमबाट ट्रेकिङ अफिस, गाइड, हेलि एजेन्ट, अस्पताल सबै मिलेर इन्स्युरेन्स कम्पनी ठग्ने धन्दा बढेको भन्दै नाम्चे युवा समाजले यस्ता कार्यले पर्यटन व्यवसायमा ठुलो घात हुने बताएको छ  ।

फेक रेस्क्युका कारण नेपाल घुम्न आउने पर्यटकको इन्स्युरेन्स प्रिमियम बढ्दा पर्यटकको नेपाल घुम्ने खर्चमा वृद्धि हुँदै गएको बताइएको छ ।  खर्च वृद्धि हुँदा यसले खुम्बु क्षेत्रको पर्यटन व्यवसाय सँगै नेपालकै पर्यटन क्षेत्रको छविमा कालो दाग लगाउदै गएको क्लबले जनाएको छ । अव सगरमाथा क्षेत्र पर्यटकीय हिसाबले दिगो र सुरक्षित छ भन्ने सन्देश दिन सके र खुम्बु क्षेत्रको पर्यटन व्यवसायलाई मर्यादित र ठगीरहित बनाउन सके मात्रै नेपालमा क्वालिटी पर्यटक भित्र्याउन सकिने भन्दै युवा समाजले ग्राउन्ड लेभलबाटै फेक रेस्क्युको कार्य गर्न प्रलोभनमा नपर्न खुम्बुका स्थानीय र गाइड सम्मलाई यस्तो सन्देश फैलाउन लाई आफ्ना सदस्यलाई अनुरोध गरेको छ ।

सगरमाथा क्षेत्रमा फेक रेस्क्युबाट पर्यटक ठगिएको भन्दै कारण सन २०१८ मा विश्वकै प्रसिद्ध पत्रिका न्युयोर्क टाइम्सले समाचार प्रकाशित गरेको थियो । उक्त समाचारमा फेक रेस्क्युबाट पर्यटक ठगिन्छन् नेपालमा भन्ने सन्देश जानु नेपाल र पर्यटन क्षेत्रको लागी दुर्भाग्यको कुरा भएको युवा समाजले सन्देश पत्र मार्फत भनेको छ ।  नाम्चे युवा समाजका अध्यक्ष मिङ्मा ग्याल्जेन शेर्पाले विज्ञप्ति मार्फत नेपालकै गौरव सगरमाथा स्क्याम रहित बनाउन सबै लागिपर्नुपर्नेमा जोड दिनुभएको छ ।