अग्निपिडितका नाममा व्यक्तिगत फेसबुक र म्यासेन्जरबाट राहत संकलन भइरहेको प्रति थुलुङ दूधकोशीको ध्यानाकर्षण 

सोलुखुम्बु, बैशाख २४ । सोलुखुम्बुको थुलुङ दूधकोशी गाउँपालिकाले मनोमानी ढंगले राहत संकलन भइरहेको भन्दै गाउँपालिका सँग अनुमति लिएर मात्रै राहत संकलन गर्न अनुरोध गरेको छ ।  गत १९ गते गाउँपालिकाको वडा नम्बर ३ पन्चनमा आगलागीका कारण ९ वटा घर, ३ वटा पशुगोठ र केही पशु हताहत भएका थिए ।

उक्त घटनाका अग्निपीडितहरूका लागी राहत संकलन भन्दै विभिन्न व्यक्ति तथा संस्थाहरूले फेसबुक, म्यासेन्जरमा क्यु.आर पठाएर मनोमानी ढंगले राहत संकलन गरिरहेको पाइएको भन्दै यस्तो कार्य गर्नका लागी गाउँपालिका सँग अनुमति लिएर मात्रै गर्न एक सूचना मार्फत अनुरोध गरेको छ । गाउँपालिकाले राहत संकलन तथा वितरण कार्यलाई व्यवस्थित बनाउन एकद्वार प्रणाली अवलम्बन गरेकोले जुनसुकै माध्यमबाट राहत संकलन गरेपनि राहत संकलन तथा वितरण समितिलाई जानकारी गराउन र अनुमति लिनु पर्ने जनाएको छ  ।  

पन्चन अग्निपीडितको राहत र उद्धारका लागी गाउँपालिकाले वडा नम्बर ३ का वडा अध्यक्ष इन्द्र मणि दाहालको संयोजकत्वमा ३ सदस्यीय राहत संकलन तथा वितरण समिति गठन गरेको छ ।   समितिमा भोजराज कार्की र युजन बस्नेत सदस्य रहनुभएको छ । उक्त समिति सँग अनुमति लिएर मात्रै राहत संकलन र वितरण गर्नुपर्ने भन्दै गाउँपालिकाले त्यसो नगरेमा कानुन बमोजिम कारवाही हुने चेतावनी दिएको छ ।

पन्चन अग्निपीडितका लागी गाउँपालिकाले यस अघि जस्तापाता, भाँडावर्तन खाद्यान्न उपलब्ध गराएकोमा आज सोमबार नगद वितरण गर्ने गाउँपालिका अध्यक्ष  असिम राईले जानकारी दिनुभयो । गत २० गते गाउँपालिका अध्यक्ष असिम राईको अध्यक्षतामा बसेको भर्चुअल कार्यपालिका बैठकले आर्थिक सहित अन्य सामाग्री दिने निर्णय गरेको थियो ।

सम्बन्धीत समाचार

https://everestupdate.com/?p=752