सोलुखुम्बु ः विमानस्थल थरीथरी, उडानमा भोकमरी 

सोलुखुम्बु, असोज १८,  नेपालकै सबैभन्दा बढी विमानस्थल भएको जिल्ला सोलुखुम्बुमै जहाज उडान कम हुँदा समस्या यात्रुलाई भएको छ  । जिल्लामा ५ वटा विमानस्थल भएपनि पर्याप्त हवाई उडान नहुँदा सोलुखुम्बुबाट जिल्ला बाहिर जाने यात्रुलाई समस्या भएको हो । जिल्लामा रहेका विमानस्थल मध्ये नियमित जहाज उडान हुने लुक्ला र फाप्लु विमानस्थल हुन ।  तर यि दुई मध्येपनि फाप्लु विमानस्थलमा जनआवश्यकता अनुसार उडान नहुँदा आवतजावतमा समस्या भएको हो ।

 जिल्ला सदरमुकाममै रहेको विमानस्थलमा अहिले चाडपर्वको सिजनमा यात्रु पर्याप्त भएपनि उडान कम भएपछि जिल्लाबाट बाहिरिने यात्रुले निकै समस्या भोग्नुपरिरहेको छ ।  

चाडपर्वको समयमा देशभर बाढी पहिरोको ताण्डव नृत्यले सडक सञ्जाल विच्छेद हुँदा हवाई उडान नितान्त आवश्यक भएपनि उडानका लागी हवाइजहाज नहुँदा सोलुखुम्बुका यात्रुलाई मर्का परेको हो ।  फाप्लु विमानस्थलबाट हप्तामा २ दिन बुधबार र शनिबार नेपाल एअरलाइन्सको एउटा जहाजले हवाई उडान गर्दै आएको छ ।  नेपाल एयरलाइन्सले गर्दै आएको उडानमा १८ सिटे जहाजले १४ जना भन्दाबढी यात्रु बोक्ने गरेको छैन । हिमाली जिल्ला भएकाले जोखिमयुक्त मौसम र लामो दुरीको यात्रा भएकाले क्षमता भन्दा कम लोड राखेर प्लेनले उडान भर्दै आएको छ ।

यसअघि नेपाल एअरलाइन्सले २ वटा जहाज मार्फत हप्तामा सातै दिन उडान गर्दै आएको पनि नेपाल एयरलाइन्सको एउटा जहाज थन्किएपछि अहिले देशभर एक वटामात्रै जहाजले उडान गरिरहेकाले यस्तो समस्या भएको नागरिक उड्यन प्राधिकरण फाप्लुका प्रमुख राजिव श्रेष्ठले बताउनुभयो । नेपाल एयरलाइन्स बाहेक अन्य निजी जहाज कम्पनीले जिल्लामा चार्टर उडान मात्रै गर्दै आएका छन् । निजी कम्पनीहरूले पनि नाफा केन्द्रित भएर पर्यटकीय सिजनमा चार्टर उडान मात्रै गरिदिँदा यात्रुलाई थप समस्या भएको छ ।  

पछिल्लो समय सडकको दुरावस्थाका कारण सोलुखुम्बु आउजाउका लागी एकमात्र उत्तम विकल्प हवाई उडान हो तर विमानस्थलको जिल्ला भनेर चिनिने यही जिल्लामा यात्रुको समस्याको घडीमा यिनै विमानस्थल काम आउन सकेका छैनन् ।

                                                                        दिपेन्द्र खनाल