माैसम खुलेसँगै खुम्बुमा पर्यटकको चहलपहल बढ्दो

असोज २०, सोलुखुम्बु । सिजन सुरु भएको केही समयपछि मौसममा सुधार आएसँगै हिमाली जिल्ला सोलुखुम्बुमा पर्यटकको चहलपहल बढ्न थालेको छ ।  लामो समयको मनसुनका कारण हवाइ उडान र स्थलमार्ग दुबै  अवरुद्ध हुँदा रोकिएका पर्यटक धमाधम खुम्बु भित्रिन थालेपछी खुम्बु क्षेत्रमा चहलपहल बढ्दै गएको हो ।

   अहिले बाढी पहिरोका कारण स्थलमार्ग अवरुद्ध छन्, भएतापनि हवाई मार्ग मार्फत पर्यटक सिधै लुक्ला झर्दा खुम्बु क्षेत्रमा पर्यटकको चहलपहल निरन्तर बढिरहेको छ ।   राजमार्ग अवरुद्ध भएकाबेला  हवाइमार्गबाट खुम्बु क्षेत्र भित्रिनेको संख्या औसतमा दैनिक ८ सय बढी छ । मौसममा सुधार हुने बित्तिकै आइतबार एकैदिन खुम्बु क्षेत्रमा ८ सय पर्यटक भित्रिएको तेन्जिङ हिलारी विमानस्थल लुक्लाले जनाएको छ ।

   शरद ऋतुमा सगरमाथा क्षेत्र भ्रमण गर्न दैनिक ७ सय देखी ८ सय जना  जहाज मार्फत लुक्ला भित्रिने गरेको लुक्ला विमानस्थलका प्रमुख उमेश पन्थीले बताउनुभयो ।  उहाँका अनुसार मौसम अनुकुल भएको केही दिन यता लुक्लामा दैनिक ४० देखी ४५ जहाज र ६० वटा सम्म हेलिकप्टरको उडान मार्फत पर्यटक भित्रिने गरेका छन् ।  पर्यटक आवागमनमात्रै हुँदा लुक्लाबाट फर्कने जहाज भने खाली फर्कनु पर्ने अवस्था रहेको विमानस्थल भनाई छ  ।