झण्डै एक महिना पछि परेको पानीले मकैबालीलाई राहत 

सोलुखुम्बु, बैशाख २६ । लामो समय सम्म रहेको सुख्खायामले सुख्खा  बनाएको किसानको मकैबालीलाई मंगलबार परेको पानीले राहत दिएको छ । लामो समयसम्म लागेको खडेरीका कारण किसानको मकैबालीमा सुख्खा लागिसकेको भएपनि मंगलबार परेको पानीले केही राहत दिएको कृषि ज्ञान केन्द्र खोटाङले जनाएको छ ।

 हिमाल तथा पहाडको माथिल्लो भेगमा परेको पानीले यस क्षेत्रका किसानको मकै बालिमा हरियो फर्केको कृषि ज्ञान केन्द्र खोटाङका प्रमुख हरीनारायण राईले बताउनुभयो । जिल्लाको सबै पालिकाको माथिल्लो बेल्टमा मंगलबार परेको पानीले सो क्षेत्रको मकैवालीलाई राहत दिएको हो । जिल्लाको दिक्तेल रुपाकोट मझुवागढी नगरपालिकाका नेर्पा, नुनथला, विजयखर्क, खार्मी, पाथेका लगायथका वडाको माथिल्लो बेल्टमा मंगलबार पानी परेको छ ।  यस्तै दिप्रुङ, खोटेहाङ, हलेसी तुवाचुङ, ऐसेलुखर्क लगायतका पालिकाका केही वडाहरूमा भिज्ने गरि पानी प¥यो भने केहीमा माटो भिज्ने गरि पानी पर्न नसकेको उहाँको भनाई छ ।  

समग्रमा खण्डबृष्टि भएर पानी परेपनि मनग्य पानी परेको क्षेत्रमा किसानलाई राहत मिलेको उहाँको भनाई छ ।  जल तथा मौसम विज्ञान फिल्ड कार्यालय ओखलढुङ्गाका अनुसार मंगलबार खोटाङ सदरमुकाम दिक्तेलमा ४ दशमलव ७ मिलिटिर पानी परेको छ । कार्यालयका  निमित्त प्रमुख अनिल पराजुलीका अनुसार जिल्लामा झण्डै उक महिनाको निरन्तर खडेरी पश्चात पानी परेको हाे।