केन्द्रिय प्रसारण लाइन जोडिएपछि दशैँमा झिलिमिली खिजीदेम्बा

असोज २३, सोलुखुम्बु । दशैँको मुखमा ओखलढुङ्गाको खिजीदेम्बा गाउँपालिकामा केन्द्रिय प्रसारण लाइन जोडिएको छ । रामेछापमा रहेको सबस्टेसनबाट केही भागमा र ढल्केबर सबस्टेसनबाट केहीबाट विद्युत जडान गरि इतिहासमै पहिलो पटक खिजीदेम्बा गाउँपालिकामा केन्द्रिय प्रसारण लाईनको विद्युत जोडिएको हो ।  केन्द्रिय प्रसारण लाइन जोडिएपछि खिजीदेम्बा गाउँपालिकाका नागरिकले अव विस्तारै अन्धकारबाट मुक्ति पाउने गाउँपालिकाले जनाएको छ । दशैँको मुखमा गाउँमा केन्द्रिय प्रसारण लाइनको विद्युत जडान भएपछि दशै उज्यालो बन्ने भएको स्थानीयको भनाई छ ।

अथक प्रयासपछि आर्थिक वर्ष २०७९÷८० बाट गाउँपालिकामा सुरु भएको विद्युतिकरणको काम गत ६ महिना अघि सकाएर ट्रान्सफर्मर चार्ज गर्न सुरु गरिएको थियो ।  जडान भएका ट्रान्सफर्मर चार्ज भएपछि अव गाउँपालिकामा विद्युतिकरण भएका वडाहरूमा मिटरबक्स जडान सुरु गरिएको गाउँपालिका अध्यक्ष गम्बु शेर्पाले बताउनुभयो ।

 गाउँपालिकामा रहेको ३५ सय घर धुरी मध्ये हाल सम्म ६ सय घरधुरी केन्द्रिय प्रसारण लाइनको पहुँचमा पुगिसकेको छ ।  बाकीँ २ हजार ९ सय घर धुरी पनि चालु आर्थिक वर्षकाे अन्त्य सम्ममा केन्द्रिय प्रसारण लाईको पहुँचमा पुगिसक्ने गाउँपालिका अध्यक्ष शेर्पाले बताउनुभयो ।  गाउँपालिकाको ९० प्रतिशत भूभागमा विद्युतिकरणको काम भइसकेकोले अव १० प्रतिशत पनि चाँडै सकेर धामधम मिटरबक्स जडान गरि नागरिकको घरघरमा विद्युत जडान हुने अध्यक्ष शेर्पाको भनाई छ ।

 नागरिकको घरमा वत्ति जडान गरिसकेर गाउँपालिकामै सबस्टेसन निर्माण गरि उद्योग धन्दा सञ्चालनका लागी समेत व्यवस्थापन हुने अध्यक्ष शेर्पाले बताउनुभयो । गाउँपालिकामै सवस्टेसन निर्माणका लागी ठेक्का सम्झौता भइसकेकाले चाँडै काम सुरु हुने उहाँको भनाई छ । गाउँपालिकामा केन्द्रिय प्रसारण लाइन जोडिएपछि अव जेनेरेटर, सोलार सेट लगायत प्रयोग गर्नुपर्ने बाध्यता हटेको छ ।