दसैँ लागेसँगै सल्लेरी बजार सुनसान

असोज २५, सोलुखुम्बु । दसैँ सुरु भएसँगै सोलुखुम्बुको सदरमुकाम सल्लेरी बजार सुनसान हुन थालेको छ। दसैँ चाड मनाउन गाउँघर फर्कनेहरूका कारण सल्लेरी बजार सुनसान बनेको हो ।

सदरमुकाममा व्यापार गर्दै आएका व्यापारीदेखि कर्मचारी, विद्यार्थी र सर्वसाधारणसमेत दसैँ बिदामा चाडपर्व मनाउन गाउँबस्ती फर्केपछि बजार सुनसान बनेको छ। केही टाढा घर भएकाहरू दुई÷तीन अघिदेखि नै गाउँ फर्कन थालेको थिए।

सदरमुकाममा बसेर पढ्ने विद्यार्थी, टाढाका शिक्षक, रोजगारी गर्दै आएका सर्वसाधारण मजदुरलगायत केही दिनअघि नै गाउँ फर्केपछि बजार सुनसान हुँदै गएको थियो ।

बुधबारदेखि सबै सरकारी कार्यालय बिदा भएसँगै कर्मचारीहरू पनि आ–आफ्नो घर गाउँ लागेपछि बजार थप सुनसान भएको हो। यसरी गाउँघर फर्कनेका कारण बजार सुनसान हुँदै गएको सोलुखुम्बु उद्योग वाणिज्य सङ्घका अध्यक्ष रामलाल श्रेष्ठले जानकारी दिनुभयो ।

अध्यक्ष श्रेष्ठका अनुसार बुधबार र विहिबार सम्म बजारमा सामान्य चहलपहल रहे पनि शुक्रबारदेखि ठप्प भएको हो । स्थानीय बजारवासी यहीँ रहे पनि पसलहरू नखुल्ने हुँदा बजार पूर्णरुपमा सुनसान देखिएको उहाँको भनाई छ । दसैँ सकिएपछि मात्र बजारमा चहलपहल सुरु हुने श्रेष्ठले बताउनुभयो ।