खुम्बुमा पर्यटकको चहलपहल बढ्दो, ३ दिनमा २४ सय बढी

असोज २६, सोलुखुम्बु । सिजन सुरु भएको केही समयपछि मौसममा सुधार आएसँगै हिमाली जिल्ला सोलुखुम्बुमा पर्यटकको चहलपहल बढ्न थालेको छ । लामो समयको मनसुनका कारण हवाइ उडान र स्थलमार्ग दुबै अवरुद्ध हुँदा रोकीएका पर्यटक धमाधम खुम्बु भित्रिन थालेपछि खुम्बु क्षेत्रमा चहलपहल बढ्दै गएको हो ।

अहिले बाढी पहिरोका कारण स्थलमार्ग अवरुद्ध छन, तापनि हवाई मार्ग मार्फत पर्यटक सिधै लुक्ला झर्दा खुम्बु क्षेत्रमा पर्यटकको चहलपहल निरन्तर बढीरहेको छ । राजमार्ग अवरुद्ध भएकाबेला हवाइमार्गबाट खुम्बु क्षेत्र भित्रिनेको संख्या औसतमा दैनिक ८ सय बढी छ ।

मौसममा सुधार हुने वित्तिकै यस साताको आइतबार देखी मंगलबार सम्म एकैदिन खुम्बु क्षेत्रमा ८ सय सम्म पर्यटक भित्रिएको तेन्जिङ हिलारी विमानस्थल लुक्लाले जनाएको छ । सरद ऋतुमा सगरमाथा क्षेत्र भ्रमण गर्न दैनिक ७ सय देखी ८ सय जना जहाज मार्फत लुक्ला भित्रिने गरेको लुक्ला विमानस्थलका प्रमुख उमेश पन्थीले बताउनुभयो । तर फेरी मंगलबार देखी यता विहिबार सम्म मौसम अवरुद्ध हुदा प्लेनले उडान भर्न सकेनन् ।

यद्यपी हेलिकप्टर उडानबाट समेत दैनिक ३ सय देखी माथि पर्यटकहरु लुक्ला भित्रिरहेका छन् । उहाँका अनुसार मौसम अनुकुल भएको केही दिन यता लुक्लामा दैनिक ४० देखी ४५ जहाज र ६० वटा सम्म हेलिकप्टरको उडान मार्फत पर्यटक भित्रिने गरेका छन् ।

पर्यटक आगमनमात्रै हुदा लुक्लाबाट फर्कने जहाज भने खाली फर्कनु पर्ने अवस्था रहेको छ ।