माैसम सफा भए सगरमाथा आरोहण मे १३ बाट सुरु हुन सक्ने

बैशाख २७ सोलुखुम्बु ।  यो वर्षको सगरमाथा आरोहण मे १३ तारिख बाट सुरु हुने भएको छ । आरोहणका लागी सबै तयारी सम्पन्न गरि सकिएकाले वातावरण अनुकुल भए यो वर्षको आरोहण आगामी मे १३ बाट सुरु गर्न सकिने सम्भावना रहेको सगरमाथा प्रदुषण नियन्त्रण समितिले जनाएको छ ।  आरोहणका लागी रोप फिक्सिङ् लगायतका काम सम्पन्न भएका छन भने दक्ष कामदार आइसफल डाक्टरहरूले बाटो निर्माण गरिसकेको समितिका अध्यक्ष लामाकाजी शेर्पाले बताउनुभयो ।

यो वर्ष सगरमाथा आरोहणका लागी अनुमति लिएका ४ सय १४ जना आरोही यतिखेर सगरमाथा आधार शिविरमा छन ।   पर्यटक विभागका अनुसार गत मे ७ तारिख सम्मको तथ्याङ्क अनुसार हाल सम्म ४१ समुहका ७५ महिला र ३ सय ३९ जना पुरुषले आरोहणको अनुमति लिएका  हुन । सगरमाथा आरोहणका लागी अनुमति लिएका हरुबाट ५९ करोड बढी राजस्व संकलन भएको छ ।  पर्यटक विभाग साहसिक तथा पर्वतारोहण शाखाका प्रमुख शाखा अधिकृत राकेश गुरुङका अनुसार यो वर्षको सगरमाथा आरोहण रोयल्टीबाट ५९ करोड २३ लाख ५ हजार ८ सय ४९ रुपैयाँ राजस्व संकलन भएको हो ।

नेपालमा ३० वटा हिमाल आरोहणका लागी खल्ला गरिएको छ ।  यो वर्ष यि हिमाल आरोहणका लागी १ सय १२ समुहका ९ सय ७१ जनाले हिमाल आरोहणका लागी अनुमति लिएको पनि गुरुङले रेडियो एभरेष्टलाई बताउनुभएको छ । जसमा ७ सय ७९ पुरुष र २ सय २ जना महिला रहेका छन ।