माप्य दुधकोशी ६ ले गर्याे चाडपर्व लक्षित सडक मर्मत तथा सरसफाई

कार्तिक ४, सोलुखुम्बु । सोलुखुम्बुको माप्य दुधकोशी गाउँपालिका वडा नम्बर ६ वाकुमा सडक मर्मत तथा सरसफाई गरिएको छ । शनिबार र आईतबार दुई दिन वडा कार्यालयको पहलमा वडाबासीहरुले सडक मर्मत तथा सरसफाई गरेका हुन् ।

चाडपर्वलाई मध्यनजर गर्दै वडा अध्यक्ष रामप्रसाद मगर सहित वडाबासीहरुले सेलुवा, पापदु, ल्यमचना, दिङकु हुदैँ फापरे सम्म ओहोर–दोहोर गर्ने सडक मर्मत तथा सरसफाई गरिएको संवाददाता देविप्रसाद घिमिरेले जानकारी दिनुभयो ।

खाद्यान्न ढुवानी लगायत चाडपर्वका समयमा सहज आवतजावतको व्यवस्थाका लागि सडक मर्मत तथा सरसफाइ सुरु गरिएको वडा अध्यक्ष मगरले बताउनुभयो । वर्षायाममा सडकमा खसेको पहिरो, ढुङ्गा माटो पन्छाइएको छ ।