पर्यटक लिएर थामडाँडा जाने गाडीहरूलाई दिउँसो १ बजे अघिनै यात्रा तय गर्न नगरपालिकाकाे निर्देशन 

कार्तिक ५, सोलुखुम्बु ।  लुक्ला मन्थली हवाई उडान अवरुद्ध भएपछि सोलुदुधकुण्ड नगरपालिकाले सल्लेरीबाट यात्रुबाहक जिप तथा सुमो छुट्ने समय निर्धारण गरेको छ ।  गन्तव्यमा पुग्ने समयभन्दा पछाडि  छुटेका जिप तथा सुमोहरु ढिला गरी गन्तव्यमा पुग्ने र पर्यटकलाई सास्ती हुने भन्दै नगरपालिकाले समयसीमा निर्धारण गरेको हो ।

आइतबार एक विज्ञप्ति निकाल्दै नगरपालिकाले सल्लेरीबाट सडक मार्ग हुँदै खुम्बु क्षेत्र जाने पर्यटकहरूलाई आवतजावत गराउने यातायात सेवाहरुले दिउँसो १ बजे अघिनै छुटिसक्ने पर्ने निर्देशन गरेको छ ।  मौसम खराब हुँदा उडान हुन नसकेपछि पर्यटकहरूले काठमाण्डौ सल्लेरी फाप्लु, छिर्दिघाट थामडाँडाको बाटो प्रयोग गर्नुपर्ने बाध्यतालाई हेर्दै नगरपालिकाले दिउँसो १ बजे भन्दा अगाढी सलेरीबाट गाडी छुटिसक्नुपने जनाएको हो ।  

यदि १ बजेभन्दा पछाडि छुटे उक्त सवारीहरू रिङ्मु टाक्सीन्धु वा नुनथला बास बसी बिहान मात्रै गन्तव्य तर्फ लाग्न नगरपालिकाले जारी गरेको विज्ञप्तिमा भनिएका छ ।  जथाभावी छुट्ने सवारी साधनहरूको कारण पर्यटकहरूले गन्तव्यमा उपयुक्त व्यवस्थापन नपाउने, होटल रेष्टुराँ नपाउने गुनासोहरू आएपछि नगरपालिकाले यस्तो नियम लागू गर्नुपरेको नगर प्रवक्ता फुर्वा ग्याल्जेन शेर्पाले बताउनुभयो ।  यसरी पर्यटकहरूलाई व्यवस्थीत तवरले यातायातको व्यवस्थापन गर्दा उनीहरू अलपत्र नपर्ने र जिल्लाको पर्यटन प्रवर्द्धनमा थप टेवा पुग्ने नगरप्रमुख नाम्गेल जाङ्बु शेर्पाले बताउनुभयो ।  उहाँले नगरपालिका भित्र बास बस्ने पर्यटकहरूलाई सुलभ र सहज बासस्थानकाे व्यवस्थापन मिलाइएको जनाउनुभएको छ ।