सोताङ गाउँपालिकाको चार वटा वडामा भोलिबाट खानेपानी आयोजनाको सर्वेक्षण गरिदै

कार्तिक ६, सोलुखुम्बु । सोलुखुम्बुको सोताङ गाउँपालिकामा सुक्खाग्रस्त चार वटा वडामा खानेपानी आयोजना सञ्चालनका लागि सर्वेक्षणको काम सुरु गरिने भएको छ । बिहिवारबाट गाउँपालिकाको वडा नम्बर ३ बाट सुरु गरी वडा नम्बर १, ४ र ५ मा सर्वेक्षणको काम शुरू गरिने भएको हो ।

आज सोताङ गाउँपालिकाकी उपाध्यक्ष अन्जु नाछिरिङको अध्यक्षतामा बसेको बैठकबाट यस्तो निर्णय गरिएको कार्यपालिका सदस्य बलुकुविर नाछिरिङले जानकारी दिनुभयो । सभिल टेक कन्सलटेन्स काठमाडौँका टोलीद्धारा सर्वेक्षणको काम गरिने भएको छ ।

करीब १५ हजार उपभोक्तालाई लक्षित गरेर खानेपानी आयोजना सञ्चालन गर्न सर्वेक्षण गरिने जनाइएको छ । गाउँपालिकामा भएको छलफलमा लिन्जीखर्क खानेपानी सिगाने, चिसेनी खानेपानी, कुम्लु लुस्ने खानेपानी पहिला दर्ता भईसकेको र पुनः डिपिआर गरिने भएको छ । सर्वेक्षणको काम गर्ने भएपछि स्थानीय उपभोक्ता हर्षित भएका छन् ।

आज बसेको बैठकमा उपाध्यक्ष अन्जु नाछिरिङ, वडा अध्यक्षहरु मानविर राई, गोकर्ण बस्नेत, गाउँ प्रवक्ता कविता नाछिरिङ लगायत विभिन्न संघ संस्थाका प्रतिनिधिहरुको उपस्थिति रहेको थियो ।