थुलुङ ७ र ८ ले लगाए राती ९ बजेपछि होटल खोल्न राेक 

कार्तिक ७, सोलुखुम्बु ।     जिल्लाको थुलुङ दुधकोशी गाउँपालिका वडा नम्बर ७ र ८ मा राती ९ बजे देखि होटल पसल सञ्चालन  गर्न नपाइने भएको छ । दुबै वडाको बुधबार सम्पन्न संयुक्त बैठकले उक्त निर्णय गरेको हो । 

राती अबेर सम्म होटल सञ्चालन गर्दा मदिरापान सेवन गर्ने र गाउँघरमा होहल्ला गरि शान्तिसुव्यवस्थामा समेत असर पार्ने कार्य बढेको गुनासो बढेपछि होटल सञ्चालन सम्बन्धी समय निर्धारण गरिएको वडा नम्बर ७ का वडा अध्यक्ष भोजराज कार्कीले जानकारी दिनुभयो । प्रचलित कानुन विपरितका कार्यहरू दिनप्रतिदिन बढ्दै गएको भन्ने जनगुनासो सम्बन्धी सबै पक्षलाई सचेत गराउने र त्यसको अनुगमन तथा उक्त कार्य न्यूनीकरणका लागि स्वयंसेवी युवा  दस्ता गठन गरि संयुक्त रुपमा परिचालन गर्ने समेत निर्णय गरिएको हो । 

यस्तै अनावश्यक रुपमा होहल्ला गर्ने, बाइकमा चर्को ध्वनि निकाली नियम विपरित सवारी सञ्चालन गर्नेहरूको निगरानी गरि कानुन अनुसार कारवाहीका लागि सहयोग गर्ने पनि निर्णय गरिएको वडा नम्बर ८ का वडा अध्यक्ष राजेश किराँतीले जानकारी दिनुभयो । उहाँका अनुसार शान्ति सुरक्षाका लागि सिभिलका प्रहरीलाई समेत रातको समयमा परिचालनका लागि अनुरोध गर्ने र वडाले गठन गरेको स्वयंसेवी, युवा, सहित निर्वाचित जनप्रतिनिधिले समेत सहयोग गर्ने निर्णय भएको छ । उक्त टोली २४ सै घण्टा परिचालित हुने भएकाले ढुक्क भएर बस्न वडाले सबैलाई आग्रह गरेको छ । 

यस्तै यस वर्षको तिहारमा राति १० बजे भन्दा बढी देउसी भैलो खेल्न नपाइने समेत उक्त बैठकले निर्णय गरेको छ । सोही बैठकले दुवै वडामा पर्ने सडक खण्डलाई व्यवस्थित बनाउनको लागि १० दिन भित्र मर्मत तथा सरसफाइको कार्य गर्नको लागि महाकुलुङ र एपेक्स हाइड्रोपावर कम्पनीलाई अनुरोध गर्ने निर्णय गरेको छ