सगरमाथा राष्ट्रिय निकुञ्ज क्षेत्रमा घोडा हिँडडुल गराउन रोक 

कार्तिक ८, सोलुखुम्बु ।  सगरमाथा राष्ट्रिय निकुञ्ज क्षेत्रमा घोडा हिँडडुल गराउँदा पारिस्थितिक प्रणालीमा असर पर्ने भएपछि निकुञ्ज क्षेत्र बाहिर लैजान निर्देशन गरिएको छ । पर्यटक बोक्ने प्रयोजनले निजी घोडा धनीहरूले पर्यटकीय संवेदनशिल पदमार्गमा घोडा हिँडाउँदा पर्यटकीय क्षेत्रको पारिस्थितिक प्रणाली, बन्यजन्तु तथा बन्यपैदावारमा असर परेपछि घोडा बाहिर निकाल्न अनुरोध गरिएको निकुञ्जले जनाएको छ ।

 पर्यटक हिड्ने बाटोमा घोडाको चापले गर्दा समस्या भएको गुनासो आएपछि आजकै मितिबाट ७ दिन भित्र घोडा निकुञ्ज क्षेत्र बाहिर लैजान भनिएको सूचना अधिकारी मनोज कुमार मण्डलले बताउनुभयो । लार्चा दोभान, लाेबुचे, थुक्ला गोरक्क्षेप जस्ता अति संवेदनशिल भौगोलिक अवस्था भएका क्षेत्रहरूमा घोडाको कारणले पर्यटकलाई समस्या भएको भन्दे निकुञ्जले घोडा निकाल्न सूचना जारी गरेको उहाँले बताउनुभयो ।

निकुञ्जको सूचनालाई बेवास्ता गरेर घोडा बाहिर नलगे राष्ट्रिय निकुञ्ज तथा बन्यजन्तु संरक्षण ऐन २०२९, राष्ट्रिय निकुञ्ज तथा बन्यजन्तु संरक्षण नियमावली २०३०, हिमाली राष्ट्रिय निकुञ्ज नियमावली २०३६ लगायत अन्य ऐन कानुन बमोजिम कारवाही हुने सूचनामा भनिएको छ ।