नेचासल्यानमा बजार अनुगमन, हजारौँको अखाद्य तथा म्याद गुज्रिएका सामाग्री बरामद

कार्तिक ८, सोलुखुम्बु । सोलुखुम्बुको नेचासल्यान गाउँपालिकाले चाडपर्व लक्षित बजार अनुगमन गर्दा करिव २७ हजार बराबरको अखाद्य बस्तु जफत गरेको छ । गाउँपालिका उपाध्यक्ष तथा बजार अनुगमन संयोजक विना राईको संयोजकत्वमा विहीबार सम्पन्न बजार अनुगमनका क्रममा २६ हजार ८ सय ६५ रुपैयाँ रुपैयाँ बराबरको अखाद्य तथा मिति गुज्रिएका सामाग्री जफत गरि नष्ट गरेको हो ।

गाउँपालिकामा रहेको मुख्य विहीबार लाग्ने बिहिबारे बजार र त्रिवेणी बजार अनुगमन गर्दा उक्त मूल्य बराबरका दैनिक उपभोग्य सामाग्री बरामद गरिएको गाउँपालिकाले जनाएको छ । नेपालीहरूको दोश्रो महान पर्व दिपावली नजिकिँदै गर्दा दैनिक उपाभोग्य सामाग्रीमा हुन सक्ने कालोबजारी नियन्त्रण तथा उपभोक्ताको स्वास्थ्यलाई ध्यानमा राख्दै बजार अनुगमन गरिएको गाउँपालिका उपाध्यक्ष विना राईले बताउनुभयो ।

बजार अनुगमनका क्रममा बजार अनुगमन टोलीका संयोजक राईले बजार क्षेत्रका अधिकांश पसलहरूमा अस्पष्ट मूल्य सूची राखिएको पाइएकोले स्पष्ट देखीने गरि मूल्य सूची राख्न सुझाव दिएको गाउँपालिकाका सूचना प्रविधि अधिकृत हुतराज बाँस्तोलाले बताउनुभयो । अनुगमनका क्रममा विभिन्न कस्मेटिक सामाग्रीका साथै खाद्य सामग्रीहरू चाउचाउ, थुक्पा, आँटा, कोल्ड ड्ंिक्स(चिसो पेय पदार्थ), खाने तेल, मसला आइटमहरूमा ( चटपटे मसाला, पानीपुरी मसला, मिट मसला लगायत अन्य मसला जन्य बस्तु ) जफत गरि नष्ट गरिएको हो छ ।

विहीबार सम्पन्न बजार अनुगमनका लागी गाउँपालिका उपाध्यक्ष राई सहित गाउँपालिकाका प्रमुख प्रशासकीय अधिकृत बिशाल घिमिरे,  नेचासल्यान उद्योग वाणिज्य सङ्घका अध्यक्ष हेमराज भट्टराई, बरिष्ठ उपाध्यक्ष बिक्रम राई, गाउँपालिकामा कार्यरत सम्पुर्ण शाखा प्रमुखहरू,  इलाका प्रहरी कार्यालयका प्रहरी निरीक्षक पुष्प दर्लामी, उपभोक्ता हित संरक्षण मञ्चका अध्यक्ष, लाेचन शर्मा,  सचिव छविलाल बाँस्तोला लगायत सरोकारवालाहरूकाे सहभागिता रहेकाे थियाे ।