खोटाङमा आगलागी हुँदा ५ लाख बराबरको क्षति

कार्तिक ९, सोलुखुम्बु । आगलागी हुँदा खोटाङमा एक घर जलेर नष्ट भएको छ । हलेसी तुवाचुङ नगरपालिका–३ च्यास्मिटारका बबरसिंह राईको घर आगलागीबाट जलेर पूर्णरुपमा नष्ट भएको हो । च्यास्मिटार दाल्फुका राईको घरमा आज बिहान साँढे ६ बजे आगलागी भएको जिल्ला प्रहरी कार्यालय खोटाङले जनाएको छ ।

राईको घरमा आगलागी भएको थाहा पाएपछि च्यास्मिटार प्रहरी चौकीका प्रहरी र स्थानीयहरु भेला भएर आगो निभाउने प्रायस गरेपनि घर पूर्णरुपमा जलेर नष्ट भएको जनाइएको छ । ईको फुसको छानो भएको घरसँगै घर भित्र भएको अन्नपात, लत्ताकपडा, भाँडाकुडा सबै जलेर नष्टहुँदा करिब ५ लाख बराबरको क्षति भएको जिल्ला प्रहरी कार्यालय खोटाङका प्रहरी निरीक्षक तथा सूचना अधिकारी मोहन पोखरेलले बताउनुभयो ।

नजिकै रहेको बुहारी कल्पना राईको घरमा खाना खाएर उक्त घरमा बृद्ध बबरसिंह राई बस्ने गर्नुभएको थियो । बिहान एक्कासी घरमा आगलागी भएको बुहारी कल्पनाले देखेपछि स्थानीय र प्रहरीलाई खरब गरिएको थियो । आगलागी के कारणले भयो भनेर खुल्न सकेको छैन् । आगलागीबाट पशुचौपाय र मानवीय क्षति भने नभएको प्रहरीले जनाएको छ ।