वडाको पहलमा तिङलालीको १० वर्षसम्मकाे विद्युत महसुल हाइड्रोले तिरिदिने 

कार्तिक ९, सोलुखुम्बु । सोलुखुम्बुको सोलुदुधकुण्ड नगरपालिका ११ तिङ्लाका बाडा बासीलाई विद्युत  सेवा निःशुल्क गरिने भएको छ ।  वडाका नागरिकलाई मासिक ३० युनिट सम्मका विद्युत उपभोग गर्दा निशुल्क गरिएको जनाइएको छ ।  वडा नम्बर ११ तिङ्ला र सोलु जलविद्युत आयोजना ८२ मेगावाटको सहकार्यमा वडाका करिव १ हजार घरधुरीलाई मासिक ३० युनिट प्रति परिवार विद्युत निशुल्क गरिने भएको हो ।

हाइड्रो पावरमा रहेको सामाजिक उत्तरदायित्वको केही रकम १० देखी १५ वर्षसम्म वडावासीको विद्युत उपभोगका लागी खर्च गरिने सम्झौता भएको वडा अध्यक्ष  टङ्क बहादुर कार्कीले बताउनुभयो ।  हाइड्रोमा सामाजिक उत्तरदायित्वमा रहेको झण्डै ४ करोड ५० लाख रुपैयाँ बजेट विद्युत महसुलको अनुदानमा खर्च गरिने अध्यक्ष कार्कीले बताउनुभयो ।  अव यहाँका तिङलालीले मासिक ३ सय रुपैयाँ सम्मको विजुली खपत गर्दा पुरै निशुल्क हुने र सो भन्दा बढी युनिट खपत गरे नेपाल विद्युत प्राधिकरणको दररेट ३१ युनिट भन्दा माथि जति खपत हुन्छ त्यतिको मात्र महसुल बुझाए हुने छ ।  

अध्यक्ष कार्कीका अनुसार विद्युतको पैसा जलविद्युतमै खर्च गरेर यहाँका सर्वसाधारण, जनतालाई सरकार भएको भएको आभास गराउने प्रयास गरिएको बताउनुभयो ।  आफ्नो निरन्तरको प्रयासपछि हाइड्रो पावरले १० वर्ष सम्म हरेक तिङ्ला बासीको विद्युत महसुल तिरिदिने सम्झौता भएको बताउनुभएको छ ।  तार मुनिको गाउँको रुपमा विकसित हुँदै गएको तिङ्लालाई यसले केही राहत हुने भन्दै अव अन्य जलविद्युत आयोजनासँग समेत समन्वय गरि वडा बासीलाई विद्युत निशुल्क गराउने प्रयास गरिने उल्लेख गर्नुभएको छ ।

उहाँले यो सम्भवतः जिल्लामै पहिलो वडा जहाँ नागरिकले विद्युत महसुलमा धेरै हदसम्म निशुल्क रहेको उल्लेख गर्नुभएको छ । यस कदमले वडाका झण्डै ५० प्रतिशत जनताले विद्युत महसुलमा शतप्रतिशत छुट पाउने बताउनुभएको छ ।  तिङ्ला जिल्लामै सबै भन्दा बढी हाइड्राे पावर प्रभावित गाउँको रुपमा चिनिन्छ ।