खुम्बु जोड्ने मितेरी पुल पुनः निर्माण लागी विज्ञ टोलीको अध्ययन 

कार्तिक १०, सोलुखुम्बु । गत साउन ३२ हिमताल फुटेर आएको बाढीले क्षति पु¥याएको मितेरी पुल पुनः निर्माणका लागी विज्ञ टोली अध्ययन गरेको छ ।  शनिबार माप्य दुधकोशी गाउँपालिका  र खुम्बु पासाङ ल्हामु गाउँपालिकाको सिमानामा रहेको दुधकोशी माथिको खुम्बु जोड्ने उक्त मितेरी पुल पुनः निर्माणका लागी विज्ञ टोलीले अनुसन्धान गरि विकल्प सहितको निर्णय दिएको छ । खुम्बु पासाङ ल्हामु गाउँपालिका र माप्य दुधकोशी गाउँपालिकाको संयुक्त  लगानीमा हुने मितेरी पुलको निर्माण यथाशीघ्र गरिने दुबै गाउँपालिकाले जनाएका छन् ।

शनिबार पुलका अध्ययनका लागी माप्य दुधकोशी गाउँपालिका अध्यक्ष बुद्धिकिरण राई, वडा अध्यक्षहरु सज्जन राई, चन्द्र कुमार राई खुम्बु पासाङ ल्हामु गाउँपालिकाका प्रवक्ता ल्हाक्पा छिरी शेर्पा, माप्य दुधकोशीका प्रमुख प्रशासकीय अधिकृत जितेन्द्र यादव, खुम्बुका इन्जिनियर दीप कुमार बस्नेत सहित विज्ञहरूको टोली पुगेको थियो ।

 हिमताल फुटेर आएको बाढीका कारण उक्त पुलमा क्षति पुगेपछि अहिले सल्लेरी माप्य, खरिखोला सडक सञ्जाल अवरुद्ध छ ।  खुम्बु पासाङ ल्हामु गाउँपालिकालाई तल्लो सोलु सँग जोड्ने एक मात्र पुलको रुपमा रहेको उक्त पुल बाढीले बगाएपछि अहिले पर्यटक तथा यात्रुहरूले कष्टकर हिसावले सडक यात्रा गरिरहनुपरेको छ ।