वडाध्यक्ष विरुद्ध कानूनी प्रक्रिया अघि बढाउने सहमति भएसँगै खोलियो वडा कार्यालयको ताला

कार्तिक ११, सोलुखुम्बु । खोटाङको साकेला गाउँपालिका–४ मात्तिम वडा कार्यालयमा लगाईएको ताला वडाध्यक्ष विरुद्ध कानूनी प्रक्रिया अघि बढाउने सहमतिमा खुलाईएको छ ।

गाउँपालिका उपाध्यक्ष बिर्सिका राई, निमित्त प्रमुख प्रशासकीय अधिकृत सर्मिला राई र सर्वदलीय, सर्वपक्षीय भेलाका संयोजक पूर्ववडाध्यक्ष कृष्णप्रसाद भट्टराई सहित पाँच राजनीतिक दलका प्रमुख तथा प्रतिनिधिबीच शर्त र सम्झौता भएपछि ताला खोलिएको हो ।

जनताको मतलाई लत्याएर अमेरिका छिरेका वडाध्यक्ष कट्वाल विरुद्ध थप कानूनी प्रक्रिया अघि बढाउन र सम्बन्धित निकायमा पहल गर्न गाउँपालिकाले सहमति जनाएपछि ताला खोलिएको पूर्ववडाध्यक्ष भट्टराईले बताउनुभयो ।

२०८० माघ १७ गतेदेखि वडामा अनुपस्थित हुँदै अमेरिका पुगेका वडाध्यक्ष अर्जुनकुमार कट्वाल ९ महिना बित्दा पनि वडामा नफर्केपछि गत बुधबार पूर्ववडाध्यक्ष भट्टराईको संयोजकत्वमा वडामा बसेको सर्वदलीय, सर्वपक्षीय भेलाले समस्या समाधान नभएसम्मलाई वडा कार्यालयमा ताला लगाएको थियो ।