सर्जिकल आँखा केन्द्र फाप्लुकाे सामाजिक परिक्षण सम्पन्न 

कार्तिक ११, साेलुखुम्बु ।  तिलगङ्गा आँखा प्रतिष्ठान सर्जिकल आँखा केन्द्र फाप्लुले वार्षिक सामाजिक परिक्षण सम्पन्न गरेको छ ।  क्योर व्लाइन्डनेस परियोजनाको सहयोगमा समाज कल्याण परिषदसँग भएको सम्झौता अनुसार जिल्लाभित्र नेपाल आँखा कार्यक्रम तिलगङ्गा आँखा प्रतिष्ठान मार्फत सञ्चालित अन्धोपन न्यूनिकरण कार्यक्रमको लक्ष र प्रगतिको सामाजिक परिक्षण सम्पन्न भएको हो । आइतबार केन्द्रको जिल्ला कार्यालय सोलुखुम्बुमा वार्षिक सामाजिक परिक्षण सम्पन्न गरेको हो ।  

सामाजिक परीक्षणका क्रममा केन्द्रले चालु वर्षमा गरेका कामहरूको बारेमा जानकारी गराउनुका साथै जिल्लामा आँखा सेवा प्रारम्भ भएको समय देखी हाल सम्मको प्रगति विवरण सार्वजनिक गरिएको ।  जिल्लामा आँखा स्वास्थ्य सम्बन्धी सेवाको प्रगति र अवस्थाको बारेमा तिलगङ्गा आँखा प्रतिष्ठानका वरिष्ठ अनुगमन मल्याङ्कन र परियोजना विकास अधिकृत पुष्प बाबू बस्नेतले प्रस्तुत गर्नुभएको छ ।  

उहाँले प्रस्तुत गर्नुभएको आँखा स्वास्थ्य सम्बन्धी प्रगति विवरणमा जिल्लामा हाल सम्म ७७ हजार बढीको आँखा परिक्षण गरिएको, २ हजार १ सय बढीको आँखा   शल्यक्रिया गरि पुनदृष्टी प्रदान गरिएको उल्लेख छ । यस्तै परियोजनाको सामाजिक परीक्षणका क्रममा दूरदराजमा रहेका आँखा बिरामीहरूलाई स्थानीय स्तरमै सेवा दिने अभिप्रायका साथ स्थानीय सरकारसँग तिलगङ्गा आँखा प्रतिष्ठानले आँखा सेवा विस्तार र अन्य कार्यक्रम सञ्चालन गर्ने जनाइएको छ ।  

कार्यक्रम सामाजिक परीक्षणका क्रममा सेवाग्राहीहरूलाई आँखा स्वास्थ्यमा पाएको सेवाका विषयमा आँखा केन्द्रको खुलेर प्रशंसा गरेका छन् ।  दुबै आँखा नदेखेर सास्ती भोगिरहेका सेवाग्राही बल बहादुर श्रेष्ठले आँखा उपचार गराएपछि निकै खुसी महसुस गरेको बताएका छन् ।

सामाजिक परिक्षण क्रममा नेकपा एमाले जिल्ला कमिटी सचिव कल्पना राईले जिल्लामा आँखा सेवा सुरु भएपछि नागरिकलाई धेरै राहत भएको भन्दै सेवाको विस्तृतीकरण र प्ररिस्कृत गर्दै जानुपर्ने बताउनुभएका छ ।  उहाँले जिल्लाभर ग्रामीण आँखा केन्द्रको स्थापनाले अझ तल्लो तह देखीनै नागरिकले आँखाको सेवा लिन पाउने भएपछि आँखा स्वास्थ्यमा जिल्लाले छलाङ मारेको उल्लेख गर्नुभयो ।

यस्तै सर्जिकल आँखा केन्द्र फाप्लुका अध्यक्ष ङिमा तेण्डुप शेर्पाले जिल्लामा आँखा स्वास्थ्यलाई प्राथमिकताका साथ अघि बढाएको बताउनुभएको छ ।  उहाँले क्रमशः परिस्कृत र सबलीकरण गर्दै लैजानु सबैको दायित्व भएको भन्दै जिल्लाको सबै पालिकामा ग्रामीण आँखा केन्द्रको स्थापना भएको यो पहिलो जिल्ला हुने जिकिर गर्नुभयो ।

सामाजिक परीक्षणका अध्यक्ष तथा सोलुदुधकुण्ड नगरपालिकाका उपप्रमुख गान्धीमाया तामाङले आँखा स्वास्थ्य मानव जीवनको सबैभन्दा महत्वपूर्ण र अभिन्न स्वास्थ्य भएको बताउँदै स्थानीय सरकारको रुपमा सोलुदुधकुण्ड हरेक हिसाबले सहयोग गर्न तयार रहेको उल्लेख गर्नुभयो ।

सामाजिक परिक्ष्णका लागी जिल्ला सर्जिकल आँखा केन्द्र फाप्लुमा जिल्लामा सकृय राजनितिक दलका प्रमुख तथा प्रतिनिधी, स्थानीय समुदाय, आँखा केनद्रका कर्मचारी तथा प्रतिनिधी लगायतको उपस्थीति रहेको थियो ।