सगरमाथा आरोहीकाे विद्युतीय ट्रयाकिङ हुने, आरोहीलाई चिप्स अनिवार्य

सगरमाथा आरोहणमा जाने आरोहीलाई विद्युतीय चिप्स लगाएर पठाउने भएको छ । पर्यटन विभागले विश्वको सर्वोच्च शिखर सगरमाथा आरोहण गर्न जाने आरोही तथा आरोहण दलकासदस्यलाई आउने वसन्तयामबाट विद्युतिय
चिप्स अनिवार्य गर्न लागेको हो । विभागमा मंगलबार बसेको सरोकारवाला निकायको बैठकले यस्तो निर्णय गरेकाे हाे ।

आगामी वसन्तयामबाट लागू हुने गरी आरोहणमा जाने दलका सदस्यसहित आरोहीले अनिवार्य रूपमा विद्युतीय चिप्स प्रयोग गर्नु छ ।
आरोहणमा जाने आरोही समस्यामा परे तत्काल उद्धार गर्न सहयोगपुग्ने विश्वासका साथ यसो गर्न लागिएको हो ।
आरोहीले आफ्नो ज्याकेटमा यस्तो चिप्स राखेर जानुपर्ने व्यवस्था गरिनेछ। यस्तो चिप्सकोसेवा शुल्क आरोहण व्यवस्थापन गर्ने एजेन्सीले तिर्नु पर्नेछ। चिप्स पेनड्राइभ आकारको हुनेछ।

विभागका अनुसार चिप्सको मूल्य करिब १० अमेरिकी डलर पर्नेछ । आरोही हराएको अवस्थामा खोज तथा उद्धार कार्यका लागि डिटेक्टर प्रणालीले चिप्सलाई ट्रयाकिङ गरी खोजी तथा उद्धार गर्नेछ । चिप्सको सहयोगमा लामो समयसम्म ट्रयाकिङ गर्न सकिने भएकाले हिउँमा पुरिएका तथा खोचमा झरेका आरोहीको खोज तथा उद्धार गर्न सहज हुने विश्वास लिइएकाे छ ।  विभागका अनुसार पहिलो चरणमा सगरमाथा र पछि अन्य हिमालमा समेत यस्तो चिप्सको प्रयोग गर्ने योजना अगाडि सारिएको छ । विगतमा आरोहणका क्रममा आरोही हराउने र खोज तथा उद्धार गर्न समस्या हुँदै आएको थियो।

अन्तर्राष्ट्रिय बजारमै परीक्षित अनि प्रयोग भएका गुणस्तरयुक्त चिपहरू एजेन्सीमार्फत् दिने बताइएकाे छ ।

विभागले आरोहीलाई सुरक्षा प्रदान गर्न गएको वर्ष हिमाल आरोहणमा जीपीएस (ग्लोबल पोजीसिनिङ सिस्टम )ट्रयाकिङ सिस्टम परीक्षण गरेको थियो । तर जीपीएस उपकरण प्रयोग गर्दा ब्याट्री निश्चित समयमा सकिने र ब्याट्री सकिएपछि ट्रयाकिङ नहुने समस्या आएको थियो । यही कारण अहिले चिप्स प्रयोग गर्ने र यो जीपीएसभन्दा बढी फाइदाजनक हुने जनाइएको छ । विभागले गत आठ वर्षदेखि आरोहणलाई व्यवस्थित गर्ने प्रकृयामा तीन वर्ष अगाडि जीपीएस डिभाइस खरिद गरेको थियो ।तर यसको परीक्षणबाहेक पूर्णरूपमा कार्यान्वयनमा ल्याउन सकेको छैन। गएको वसन्तयाममा परीक्षण गरे पनि विभागले कार्यान्वयनमा ल्याउन सकेन। विभागले २० डिभाइस खरिद गरेर वि.स. २०७७ मा नै जीपीएस ट्रयाकिङ लागू गर्ने तयारी गरेको थियो।