व्यक्तिगत जग्गाबाट खनिएको सडक बन्द गरिदिएपछि सल्लेरीका १३ सय घरधुरी समस्यामा

कार्तिक १२, सोलुखुम्बु ।  व्यक्तिगत जग्गाबाट प्रयोग हुँदै आएको सडक बन्द भएपछि सल्लेरी च्याल्सा सडक प्रयोगकर्ता सडक विहीन भएका छन् ।  उद्योग वाणिज्य सङ्घका अध्यक्ष रामलाल श्रेष्ठको निजि जग्गा प्रयोग गरि बनाइएको सडक श्रेष्ठले बिचमा पर्खाल लगाएर छेकिदिएपछि सोलुदुधकुण्ड नगरपालिका वडा नम्बर ५ जेरो प्वाइन्ट जिल्ला समन्वय समितिको गेटबाट शिवमन्दिर, कारागार, च्याल्सा विद्युत कम्पनी जाने सडक प्रयोगकर्ता सडक विहीन भएका छन् । 

द्वन्द्वकालमा नेपाल आर्मीले साविकको पैदल बाटो अधिग्रहण गरेपछि वैकल्पिक बाटो प्रयोग गर्नुपर्ने बाध्यतामा परेका स्थानीयलाई अहिले व्यक्तीले आफ्नो जग्गाबाट बाटो लान नदिएपछि मर्कामा परेका हुन  । बाटो बन्द भएपछि च्याल्सा, कारागार क्षेत्र, थल्लेरी, सोलुखुम्बु बहुमुखी क्याम्पस क्षेत्रका नागरिक सडक विहीन अवस्थामा रहेकाछन् । 

सडकको विकल्प खोज्न अनुरोध गर्दै सोमबार सोलुदुधकुण्ड नगरपालिका वडा नम्बर ५ पुगेर स्थानीयले शिघ्र बाटोको विकल्प खोज्दै सहजीकरण गरिदिन माग गरेका छन् ।  यस अघि रक्षामन्त्री मानवीर राईलाई बाटोको विकल्प खोज्न आग्रह गर्दा समन्वय गर्ने प्रतिबद्धता जनाएपनि अहिले सम्म कुनै सुनवाई नभएपछि स्थानीयले आन्दोलन गर्नुपर्ने अवस्था श्रीजना हुँदै गएको बताएका छन् ।  सडक बन्द भएपछि आवतजावतमा समस्या भएको भन्दै स्थानीयले साबिक सेर्गाखोप देखी शिवमन्दिर जोड्ने नक्सामा भएको बाटोमा नेपाल आर्मीको दुर्गाबक्स गण बसेकाले त्यहाँबाट बाटो लैजान नदिएको भन्दै स्थानीयले विकल्प खोज्न नगरप्रमुख नाम्गेल जाङ्बु शेर्पा, वडा अध्यक्ष मिङ्मार तामाङलाई अनुरोध गरेका छन् ।  

स्थानीय पेम्बा शेर्पाका अनुसार सडक बन्द भएपछि सडकको विकल्प का लागी नियामक निकायहरूले पहल गर्नुपर्नेमा त्यसो नगरी मौन बसेका छन् ।  तर यता अध्यक्ष मिङमार तामाङले भने सडकको ट्रयाक खोल्नका लागी नेपाल आर्मीसँग समन्वय गर्ने बताउनुभएको छ ।  स्थानीयले बाटोको विकल्प खोज्न सरकारले सहयोग नगरे कडा आन्दोलनमा उत्रने चेतावनी समेत दिएका छन् ।