अल्ट्रा धावक सुमनलाई सिकप्रिड फाउण्डेशनले आर्थिक सहयोग गर्ने

कार्तिक १३, सोलुखुम्बु । नेपालका अल्ट्रा धावक सुमन कुलुङ राईलाई अस्ट्रियाको सिकप्रिड फाउण्डेशले सहयोग गर्ने भएको छ । विगत दुई वर्षदेखि धावक राईलाई आवश्यक सहयोग गर्दै आएको फाउन्डेसनले आगामी खेल जीवनभर सहयोग गर्ने बताएको हो ।

यसका लागि वर्षको करिब १२ हजार युरो खर्च हुने फाउन्डेसनले अनुमान गरेको छ । राष्ट्रिय खेलकुद परिषद्का सदस्य सचिव टंकलाल घिसिङसँगको भेटमा फाउन्डेसनकी अध्यक्ष सिकप्रिडले धावक राई विश्वको दश जना खेलाडीभित्र पर्ने सम्भावना रहेको बताउनुभयो ।

राईको शारिरीक परीक्षणबाट उनीभित्र खेल सम्भावना देखिएको जानकारी गराउँदै नेपालमा सुमनजस्ता धेरै खेलाडी हुन सक्ने उहाँको भनाइ छ । धावक राई पर्यटकको गाइडका रूपमा काम गर्दा दुई वर्षअघि फाउन्डेसनका पदाधिकारीसँग सम्पर्कमा आएका थिए ।

फाउन्डेसनले राईको सम्पूर्ण मेडिकल चेकअप गर्दा विश्वका दश धावकभित्र पर्ने सम्भावना देखिएको भन्दै सहयोग गरेको जानकारी दिएको छ । फाउन्डेसनकी अध्यक्ष सिकप्रिडले सन् २०२५ सेप्टेम्बरमा आयोजना हुने वर्ल्ड च्याम्पियनसिपमा सहभागी हुने नेपाली टिमका लागि मेडिकल लगायतको खर्च व्यवस्थापन गरिदिने बताउनुभयो ।