देउसी भैलो कार्यक्रमबाटै हिमाल दर्शनमा झण्डै ३ लाख दान

कार्तिक १७, सोलुखुम्बु । सोलुखुम्बुको हिमाल दर्शन माध्यमिक विद्यालयले आयोजना गरेको देउसी भैलो कार्यक्रममा २ लाख ७४ हजार बढी रकम सङ्कलन भएको छ । जिल्लाको नेचासल्यान गाउँपालिका ३ मा रहेको विद्यालयले आयोजना गरेको देउसी भैलो कार्यक्रम मार्फत विद्यालयमा स्वर्ण कोष स्थापनार्थ आयोजित देउसी भैलो कार्यक्रमबाट २ लाख ७४ हजार ४ सय ७ रुपैयाँ रकम सङ्कलन भएको हो ।

विद्यालय स्थापनाको ५० औँ वर्ष पुग्दै गरेको अवसरमा स्वर्ण कोष स्थापनाका लागी विभिन्न दाताहरूले गरेको इच्छादान मार्फत उक्त रकम सङ्कलन भएको बिद्यालयले जनाएको छ । स्वर्ण कोषको स्थापनाका लागी आयोजित देउसी भैलो कार्यक्रममा २ लाख ८ हजार १ सय ५० रुपैयाँ रञ्जेलामा राई स्मृति कोषका दाताहरू सर्वधन राई, राजकुमार राई र प्रशान एलुङ्ग राईले उक्त रकम इच्छादान गर्नुभएको जनाइएको छ ।

यस्तै विद्यालयको प्राङ्गणमा थापिएको दान नाङ्लोमा स्थानीयहरुले गरेको सहयोगबाट ६६ हजार २ सय ५७ रुपैयाँ सङ्कलन भएको थियो । उक्त दुबै दानबाट २ लाख ७४ हजार रुपैयाँ ४ सय ७ रुपैयाँ रकम सङ्कलन भएको सहकर्मी धनकुमार ढुंगेलले बताउनुभयो । विद्यालयले लिएको ५० वर्ष ५० संकल्पलाई साकार बनाउनका लागी दाताहरूले निरन्तर सहयोग गरिरहेको विद्यालयले जनाएको छ ।