सोलुदुधकुण्ड नगरपालिका र पाहिला पाहिलाको आशा बिच समझदारी पत्रमा हस्ताक्षर

कार्तिक २०, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ स्थित तिङ्ला स्वास्थ्य चौकी भवन निर्माणका लागि सोलुदुधकुण्ड नगरपालिका र पाहिला पाहिलाको आशा फ्रान्स बिच समझदारी पत्रमा हस्ताक्षर गरिएको छ ।

मंगलबार सुविधा सम्पन्न भवन निर्माणका लागि सोलुदुधुकण्ड नगरपालिकाका मेयर नाम्गेल जाङ्बु शेर्पा र पाहिला पाहिलाको आशा फ्रान्सका अध्यक्ष पासाङ काजी शेर्पाले समझदारी पत्रमा हस्ताक्षर गर्नुभएको हो ।

करिब २ करोड ५० लाख लागतमा निर्माण सम्पन्न हुने भवनका लागि पाहिला पाहिलाको आशा फ्रान्सले ५० लाख रुपैँया आर्थिक सहयता उपलब्ध गराउने भएको छ । हस्ताक्षर कार्यक्रममा पिपिकेएफका अध्यक्ष पासाङ काजी शेर्पाले सोलुदुधकुण्ड नगरपालिकासँगको सहकार्यमा स्वास्थ्य चौकी निर्माणका लागि आर्थिक सहयोग गर्ने प्रतिबद्धता जनाउदै सहयोग गर्न पाउँदा खुसी व्यक्त गर्नुभएको छ ।

यस्तै पाहिला पाहिलाको आशा फ्रान्सले गरेको सहयोग प्रति आभार प्रकट गर्दै सोलुदुधकुण्ड नगरपालिकाका मेयर नाम्गेल जाङ्बु शेर्पाले आगामी दिनमा समेत सहकार्य हुने विश्वास लिनुभएको छ । उक्त संस्थाले तिङ्लामा थेरापी सेण्टर निर्माणाधीन अवस्थामा रहेको, कोभिड–१९ मा नगरबासीलाई पुर्याउनु भएको सहयोग र विपद प्रभावित थामेबासीहरुलाई पुर्याउनु भएको सहयोग प्रति सदैव आभारी रहेको बताउनुभयो ।

हस्ताक्षर कार्यक्रममा उपमेयर गान्धी माया तामाङ, प्रवक्ता फूर्वा ग्याल्जेन शेर्पा, वडा नं। ११ का वडाध्यक्ष टंक बहादुर कार्की र वडा सदस्यहरु, वडा नं। ७ र १० का वडाध्यक्ष सोनाम ग्याल्जेन शेर्पा र होम बहादुर मगर तथा निमित्त प्रमुख प्रशासकीय अधिकृत रामकुमार खड्का लगायतको उपस्थित रहेको थियो ।