मङ्गलबार एकैदिन १३ सय बढी पर्यटक खुम्बुमा 

कार्तिक २०, सोलुखुम्बु  । विश्वकै प्रमुख पर्यटकीय गन्तव्य खुम्बु क्षेत्रमा घुम्नका लागी एकैदिन १ हजार ३ सय सय बढी पर्यटक भित्रिएका छन्  । विश्वकै अग्लो चुचुरो रहेको सगरमाथा रहेको खुम्बु क्षेत्रमा १ सय ९४ उडान मार्फत एकै दिन १ हजार ३ सय २ जना पर्यटक भित्रिएका हुन ।  तेन्जिङ हिलारी विमानस्थल कार्यालय लुक्लाका अनुसार मङ्गलबार दिनभरी भएका ५२ फ्लाइट प्लेन र १ सय ४२ हेलिकप्टर उडान मार्फत उक्त सङ्ख्यामा पर्यटक भित्रिएका हुन ।

 कार्यालयको तथ्याङ्क अनुसार  ६ सय ९३ विदेशी र १ सय ९३ नेपाली पर्यटक प्लेन मार्फत लुक्ला भित्रिएका छन् भने १ सय ४२ वटा हेलिकप्टर उडान मार्फत करिव ४ सय ५० पर्यटक लुक्ला आएका हुन ।  लुक्लामा मङ्गलबार दिनभरी तारा र सिता एयरले समान १७ वटा फ्लाइट गरेका छन् भने समिट एयरले १८ वटा उडान गरेको छ । १३ सय बढी पर्यटक खुम्बु भित्रिँदा ४ सय ५१ पर्यटकले खुम्बु छाडेको विमानस्थल कार्यालयका प्रमुख उमेश पन्थीले बताउनुभयो ।

उहाँका अनुसार मङ्गलबार ३ सय ४७ जना विदेशी र १ सय ४ जना नेपाली गरी जम्मा सो सङ्ख्याका मानिस खुम्बु बाहिरिएका हुन् ।  पर्यटकीय सिजनको मध्यान्तर तिर आइपुग्दा खुम्बु क्षेत्रमा पर्यटकको आवागमन निकै बढिरहेको छ ।  मौसम अनुकुल भएको समयमा पर्यटकको चहलपहल निकै हुने गरेका छ ।  पर्यटकको चहलपहललाई ध्यान दिँदै सुरक्षा व्यवस्थालाई पनि उत्तिकै चुस्तदुरुस्त राखिएको सोलुखुम्बु प्रहरीले जनाएको छ । जिल्ला भित्रिने पर्यटकको सुरक्षालाई ध्यानमा राख्दै प्रहरीले काम गरिरहेको  जिल्ला प्रहरी कार्यालय सोलुखुम्बुका प्रमुख डीएसपी द्वारीका प्रसाद घिमिरेले बताउनुभयाे ।