कोशी प्रदेशका खोटाङ र ओखलढुंगाका गरी दर्जन सहकारीद्वारा अर्ब बढी अपचलन

कार्तिक २२, सोलुखुम्बु । कोशी प्रदेशका खोटाङ र ओखलढुंगाका गरी दर्जन बढी सहकारीहरूले बचतकर्ताको अर्ब बढी रकम अपचलन गरेका छन् । कोशी प्रदेश सहकारी रजिष्ट्रार कार्यालयका अनुसार प्रदेशको नियमन क्षेत्रभित्र रहेका ९ वटा सहकारीले ८८ करोड ६० लाख रूपैयाँ अपचलन गरेका छन् भने केही सहकारीहरूले गरेको अपचलनमा अनुसन्धान भइरहेको छ ।

कोशी प्रदेश सहकारी रजिष्ट्रार कार्यालयका प्रमुख हरिबहादुर खत्रीकाअनुसार प्रदेश सरकारको नियमन क्षेत्रभित्र रहेका सहकारीहरूमा अपचलन भएको विषयमा उजुरी आउने, अनुसन्धान गर्ने, मुद्दा दर्ता गर्ने र मिलापत्र गर्ने काम भइरहेको छ । उहाँका अनुसार अहिलेसम्म रजिष्ट्रार कार्यालयले अनुसन्धान गरेर ३ वटा सहकारीको विरुद्धमा अदालतमा मुद्दा दर्ता गरेको छ, ६ वटा सहकारीको अनुसन्धान टुंग्याएको छ भने एउटा सहकारीको मिलापत्र गर्न सफल भएको छ ।

रजिष्ट्रार खत्रीका अनुसार इलामको सानीमाई चिया सहकारीमा ४२ लाख, पाँचथरको दोरम्भा कृषि बजार व्यवस्थापन सहकारीमा २ करोड र ओखलढुंगाको ककनी गैरीबन कृषि सहकारीमा ३ करोड बराबरको बचत अपचलन भएको विषयमा अदालतमा मुद्दा चलिराखेको छ ।

रजिष्ट्रार कार्यालयमा परेका उजुरीका आधारमा अनुसन्धान गर्दा सुनसरीको निर्धन उत्थान बचत तथा ऋण सहकारीमा ५ करोड, इटहरीको अम्बेकोशी बचत तथा ऋण सहकारीमा ६१ करोड र विराटनगरको माछापुच्छ्रे बचत तथा ऋण सहकारीमा ८ करोड बचतकर्ताको बचत अपचलन भएको देखिएको उहाँले बताउनुभएको छ । त्यस्तै, झापाका ३ वटा सहकारीमा बचतकर्ताको बचत अपचलन भएको अनुसन्धानले देखाएको रजिष्ट्रार खत्रीले बताउनुभयो ।

उहाँका अनुसार झापाको जयपुर बहुउद्देश्यीय बुद्धशान्ति सहकारीमा ५ करोड, शुभ साइत बहुद्देश्यीय सहकारीमा ४ करोड र प्रथम पाइला बहुउद्देश्यीय सहकारीमा ६० लाख रुपैयाँ बराबरको बचत अपचलन भएको छ । १८ करोड बचत अपचलन भएको विषयलाई लिएर अदालतमा मुद्दा परेको खोटाङ दिक्तेलको लालुपाते बहुउद्देश्यीय सहकारीको मुद्दालाई रजिष्ट्रार कार्यालयको समन्वयमा १३ करोड १८ करोड फरफारक गरेर मिलापत्र गरिएको समेत उहाँले बताउनुभयो ।

खत्रीकाअनुसार कोशी प्रदेश सरकारको नियामकीय क्षेत्रभित्र १०८३ वटा सहकारी दर्ता भएर सञ्चालन भएको उहाँको भनाई छ । जसमध्ये केही सहकारीहरूमा समस्या भएको विषयमा उजुरी आउने गरिरहेको छ । मोरङको उनगौरी कृषि सहकारी, विराटनगरको सुपर फाइन बचत तथा ऋण सहकारी र उदयपुरको अनुग्रह बचत तथा ऋण सहकारीमा बचत अपचलन भएको विषयमा बचतकर्ताहरूले रजिष्ट्रार कार्यालयमा उजुरी गरेका छन् । ती सहकारीहरूमाथि अनुसन्धान भइरहेको र टुंगोमा पुगिनसकेको रजिष्ट्रार खत्रीले बताउनुभयो ।