खोटाङमा निरीक्षकको लापर्वाहीले फेल भएका छात्र राष्ट्रिय परीक्षा बोर्डद्वारा उत्तीर्ण

कार्तिक २२, सोलुखुम्बु । खोटाङमा माध्यमिक शिक्षा परीक्षा (एसईई) मा परीक्षा निरीक्षकको लापर्वाहीले फेल भएका एक छात्रलाई राष्ट्रिय परीक्षा बोर्डले उत्तीर्ण घोषित गरेको छ । केपिलासगढी गाउँपालिका–५ सप्तेश्वर स्थित थर्पुडाँडा माविका छात्र शिवकुमार राईको उत्तरपुस्तिका निरीक्षकले नियतबस केरमेट गरेर अनुत्तीर्ण गराएको आरोपसहित ती छात्रका आफन्तले बोर्डमा उजुरी दिएका थिए ।

उजुरीका आधारमा राष्ट्रिय परीक्षा बोर्डले पुनः उत्तरपुस्तिका परीक्षण गरी उत्तीर्ण भएको सूचना सार्वजनिक गरेको हो । २०८० चैत २० गते पृथ्वी मावि बाक्सिला केन्द्रमा भएको अनिवार्य विज्ञान विषयको परीक्षाको उत्तरपुस्तिकामा निरीक्षकले १० वटा सहि उत्तरमा केरमेट गरिदिएका थिए ।

गत असोज १३ गते उत्तरपुस्तिका पुनः परीक्षणका लागि निवेदन दिएपछि कात्तिक ४ गते राष्ट्रिय परीक्षा बोर्डबाट प्रकाशित सूचनामा शिवकुमारको नतिजामा सुधार भएर आएको थर्पुडाँडा माध्यमिक विद्यालयका प्रध्यानध्यापक ग्यानु राईले जानकारी दिनुभयो । हालै प्रकाशित नतिजाअनुसार शिवकुमार राईले ३.४५ जीपीएसहित उत्तीर्ण भएका छन् ।

पूरक परीक्षामा भने शिवकुमारको जीपीए ३.५५ थियो । अब पछिल्लो नतिजा अर्थात् (३.४५ जीपीए) कायम हुने जनाइएको छ । परीक्षाको नतिजा सुधार भएपछि शिवकुमार गाउँपालिकाकै सबैभन्दा बढी ३.४५ जीपीए ल्याएर एसईई उत्तीर्ण गर्ने विद्यार्थी घोषित भएको गाउँपालिका प्रमुख समिर राईले बताउनुभयो ।

छात्रातर्फ थर्पुडाँडा माविकै क्याल्सी राईले ३.३९ जीपीए ल्याएर छात्रातर्फ उत्कृष्ट भएकी थिइन् । केपिलासगढी गाउँपालिकाले एसईई परीक्षामा उत्कृष्ट अंक ल्याएर उत्तीर्ण हुने छात्रछात्रालाई प्रोत्साहन स्वरुप एक–एक लाख रुपैयाँ पुरस्कार दिँदै आएको छ ।

उक्त निरीक्षकलाई कारबाहीको माग गर्दै असोज २२ गते जिल्ला प्रशासन कार्यालय, शिक्षा विकास तथा समन्वय इकाई र जिल्ला प्रहरी कार्यालयमा विद्यालय व्यवस्थापन समिति र अभिभावकले उजुरीसमेत दिएका थिए । उक्त निरीक्षकलाई कारबाही गर्नुपर्नेमा अभिभावक तथा विद्यालयले माग गरिरहेका छन् ।