सिकार खेल्न गएका जगत प्रसादको बन्दुक पड्कँदा मृत्यु 

कार्तिक २२, सोलुखुम्बु । खोटाङमा सिकार खेल्न गएका केपिलासगढी गाउँपालिका–१ फेदी पिपिङका ५८ वर्षीय एक पुरुषको मृत्यु भएको छ ।  बुधबार साँझ सिकार खेल्न भनेर जङ्गल गएका जगत प्रसाद राईको आफैले चलाएको बन्दुक पड्किदा मृत्यु भएको हो । 

  स्थानीय हात्तीढुंगे जङ्गलमा सिकार खेल्न गएका राईको मृत्यु भएको जिल्ला प्रहरी कार्यालय खोटाङले जनाएको छ । सिकार खेल्न गएका उनको भरुवा बन्दुक पड्केको आवाज उनका आफन्तहरुले सुनेपछि जंगलमा गई हेर्दा जगतप्रसाद घट्नास्थलमै उतानो परेको र छातिबाट रगत बगी मृत अवस्थामा फेला परेको जिल्ला प्रहरी कार्यालयले जनाएको छ । प्रहरी चौकी खार्ताम्छाबाट खटेको प्रहरी टोलीले घट्नास्थल सुरक्षित राखेको छ । घट्नाको थप अनुसन्धान तथा कानूनी प्रक्रियाका लागि बिहीबार बिहान जिल्ला प्रहरी कार्यालयबाट प्रहरी निरीक्षक सञ्जु कार्कीको कमाण्डमा प्रहरी टोली घट्नास्थलतर्फ खटेको छ ।