सोलुका तिन पालिका समेटिने प्रस्तावित मेरापिक राष्ट्रिय निकुञ्ज खारेजीको माग 

कार्तिक २४, सोलुखुम्बु ।  प्रस्तावित मेरापिक राष्ट्रिय निकुञ्ज खारेजीको माग उठेको छ ।  सोलुखुम्बुको महाकुलुङ गाउँपालिका सहित सोताङ र माप्य दुधकोशीका केही वडा समेत समेट्दै निर्माण हुन लागेकाे निकुञ्ज खारेजीको लागी नेपाल आदिवासी जनजाति महासङ्घले माग गरेको हो ।

 महासङ्घले काठमाडौँको भीमसेनगोलास्थित सङ्घीय परिषद्को कार्यालयमा शुक्रबार पत्रकार सम्मेलन गरी यस सम्बन्धमा सरकारको समेत ध्यानाकर्षण गराएको जानकारी दिएको छ ।  पत्रकार सम्मेलनमा बोल्दै महासङ्घका अध्यक्ष गेल्जे लामा शेर्पाले सोलुखुम्बु जिल्लाको महाकुलुङ, सोताङ र माप्य दुधकोशी गाउँपालिमा कार्यपालिका स्तरीय र वडा स्तरीय छलफल गर्दा नयाँ राष्ट्रिय निकुञ्ज निर्माण हुने सम्बन्धमा त्यस क्षेत्रका स्थानीय जनता र जनप्रतिनिधिसँग समेत परामर्श नगरिएको बताउनुभयाे ।

अध्यक्ष शेर्पाले त्यस क्षेत्रमा सबैको राय बुझ्दा त्यहाँको जनप्रतिनिधिलाई नै थाहा नभएको र कतिपय स्थानीयलाई राजस्व उठ्ने र पर्यटन बढ्ने भनेर भ्रम छरिएको भन्दै खारेजीको माग गरेको हो ।  यसैगरी महासङ्घका महासचिव दिवस राईले शुक्रबार बिहान वन तथा वातावरणमन्त्री ऐनबहादुर शाही ठकुरीलाई सिंहदरबारमा भेटेर प्रस्तावित मेरापिक राष्ट्रिय निकुञ्ज खारेज गराउने सम्बन्धी ज्ञापनपत्र बुझाइएको जानकारी दिनुभयाे ।

ज्ञापनपत्र बुझ्दै मन्त्री शाहीले पनि आवश्यक सरसल्लाहबिना निकुञ्जको काम अघि नबढाइने धारणा राखेको महासचिव राईले बताउनुभयाे । राईका अनुसार करिब चार वर्षअघि आर्थिक वर्ष २०७७/०७८ मन्त्रालयस्तरबाट उक्त राष्ट्रिय निकुञ्ज निर्माणको काम विभिन्न स्तरमा समिति बनाएर सुरु गरिएको थियो । केही जनप्रतिनिधिहरूसँग उक्त निकुञ्ज निर्माण कार्य कार्यान्वयनका लागि छलफलसमेत भयो ।