कार्तिक २६, सोलुखुम्बु । सोलुखुम्बुबाट शिक्षक सेवा आयोगको तृतीय श्रेणीमा नाम निकाल्न सफल माध्यमिक तह, तृतीय श्रेणीका शिक्षकहरूको स्थायी नियुक्ति गरिएको छ । आज सोमबार एक कार्यक्रमका बिच शिक्षा विकास तथा समन्वय इकाई सोलुखुम्बुले जिल्लाका विभिन्न स्थानीय तहका लागी ९ जना शिक्षक स्थायी नियुक्ति गरिएको हो ।
शिक्षा विकास निर्देशनालय, कोशी प्रदेश धनकुटाको कार्तिक ७ गतेको सिफारिस तथा शिक्षा विकास तथा समन्वय इकाई कार्यालयको कार्तिक २१ गतेको निर्णय अनुसार सोमबार जिल्लाका माध्यमिक विद्यालयमा रिक्त रहेको दरबन्दी तथा करार शिक्षकको स्थानमा पदस्थापना गरिएको शिक्षा विकास तथा समन्वय इकाई सोलुखुम्बुका प्रमुख पुण्य राज डङ्गोलले जानकारी दिनुभयो ।
उहाँका अनुसार अग्रेंजी, नेपाली, विज्ञान सामाजिक विषयका शिक्षकको पदस्थापना गरिएको हो । नियुक्ति भएका शिक्षकहरूलाई इमानदार, कर्तव्यनिष्ठ र नैतिकताको आदर्शले प्रेरित भई अध्यापन कार्य गर्नुका साथै आफ्नो जिम्मेवारी प्रचलित कानुन बमोजिम बहन गर्न प्रमुख डगाेंलले आग्रह गर्नुभयो ।
यस्तै जिल्ला समन्वय समिति सोलुखुम्बुका प्रमुख कृष्णप्रसाद निरौलाले विद्यालयहरूमा शिक्षा प्रणाली फरक फरक रहेको बताउँदै सबै विद्यालयमा एकरूपता ल्याउनु पर्नेमा जोड दिनुभयो । यता प्रमुख जिल्ला अधिकारी अनोज कुमार घिमिरेले बालबालिकाहरूको भविष्य सुनिश्चित गर्न र देशको शैक्षिक अवस्था परिवर्तन गर्न शिक्षकहरूको महत्त्वपूर्ण भूमिका हुने भएकाले शिक्षकहरूले आफ्नो कर्तव्य र दायित्व निर्वाह गर्न सुझाव दिनुभयो ।
Discussion about this post