उदयपुरका छुट्टा–छुट्टै ठाउँमा दुर्घटना हुँदा दुई जनाको मृत्यु

कात्तिक ३०, साेलुखुम्बु ।   उदयपुरको छुट्टा–छुट्टै ठाउँमा बिहीबार ट्याक्टर दुर्घटना हुँदा दुई जनाको ज्यान गएको छ । उदयपुरगढी गाउँपालिका २ गेर्खेमा प्र.१–०२–००२.त.९६१ नंम्बरको र रौतामाइ गाउपालिका १ डहरमा प्रदेश.०३–००१ त. ८१९० नंम्बरको ट्रयाक्टर दुर्घटना भएको जिल्ला प्रहरी कार्यालयका सूचना अधिकारी डिएसपी राजन चापागाईले जानकारी दिनुभयाे ।

दुर्घटनामा भोजपुर हतुवागढी गाउँपालिका २ का १९ बर्षिय चालक निरज मगर र रौतामाइ गाउँपालिका १ डहरका ४० बर्षिय चक्रबहादुर तामाङको ज्यान गएको  प्रहरीले बताएकाे छ ।  दुर्घटनामा घाईते भएका ताप्ली गाउँपालिका २ का २२ बर्षिय रमेश श्रेष्ठ, रौतामाई १ का १८ बर्षिय मनीषा तामाङ र सोही ठाउँका २३ बर्षिय शुरेश तामाङलाई थप उपचारका लागि बिराटनगर पठाइएको छ ।

उदयपुरगढीबाट ताप्लीतर्फ जाँदै गरेको उक्त ट्याक्टर आफै अनियन्त्रित भइ रोडबाट ५० मिटर तल झरेको घटनाको सर्जमिनज मुचुल्का तयार गर्न पुगेका प्रहरी निरीक्षक (इन्स्पेक्टर) सन्तोष कार्कीले बताउनु भयाे ।

त्यसैगरी,  लिम्चुङ्गको गाउँपालिकाको डहरमा मेलामा गएको ट्रयाक्टर रौतामाइ डहरस्थित भित्री सडक खण्डमा अनियन्त्रित भई सडकमै पल्टिएको डिएसपी चापागाईले जानकारी दिनुभयाे ।  दुर्घटनामा ट्याक्टर चालक फरार रहेकोले खोजी कार्य भईरहेको छ ।  घटनाको थप अनुसन्धान र कानुनी प्रकृया अगाडि बढाईएको जनाइएकाे छ ।