सोलुखुम्बुका थुलुङ, माप्य र साेलुदुधकुण्डमा पहाडी क्षेत्र काष्ठफल आयोजना कार्यान्वयनका लागी प्रस्ताव आह्वान 

कार्तिक ३०, सोलुखुम्बु । पहाडी क्षेत्र काष्ठफल तथा फलफूल विकास आयोजना अन्तर्गत सोलुखुम्बुका ३ वटा पालिकामा फलफूल लगाउन प्रस्ताव आह्वान गरिएको छ ।  जिल्लाका ३ वटा पालिकामा काष्ठफल विकास आयोजना कार्यान्वयनका लागी कृषि विकास निर्देशनालय कोशी प्रदेशले प्रस्ताव माग गरेको हो ।  

कृषि समुह सहकारी तथा उद्यमीहरूका लागी अनुदान व्यवस्थापन कार्यविधि २०८१ अनुसार कार्यक्रममा आवद्ध हुन निर्देशनालयले जिल्लाका ३ वटा पालिका माप्य दुधकोशी, थुलुङ दधकोशी र सोलुदुधकुण्ड नगरपालिकाका कृषि समूह, कृषि सहकारी र उद्यमीहरूलाई अावेदन दिन भनेको छ ।  निर्देशनालयले जिल्लाका माप्य दुधकोशी गाउँपालिकामा ३० हेक्टरमा सुन्तला फल, २० हेक्टर कागती, ३० किवी र २० हेक्टर ओखर लगाउने आवेदन दिन अनुरोध गरेको छ ।

यस्तै निर्देशनालयले थुलुङ दुधकोशी गाउँपालिकाको ४० हेक्टर क्षेत्रफलमा सुन्तला, २० हेक्टर क्षेत्रफलमा कागती, ३० हेक्टरमा किवी र १० हेक्टरमा ओखर लगाउन आवेदन आह्वान गरेको छ । यस्तै जिल्लाको एक मात्र नगरपालिका सोलुदुधकुण्ड नगरपालिकामा ५० हेक्टर क्षेत्रफलमा स्याउ, १० हेक्टर क्षेत्रफलमा कागती, ३० हेक्टर क्षेत्रफलमा किवी र १० हेक्टर क्षेत्रफलमा ओखर लगाउनका लागी आवेदन आह्वान गरेको छ । इच्छुक कृषकहरूले सम्बन्धित स्थानीय तहमा आवेदन पेश गर्न ३५ दिने सूचना जारी गरेको छ ।  सोलुखुम्बुका ३ सहित प्रदेशका १३ वटा पालिकामा चालू आर्थिक वर्षमा यो आयोजना कार्यान्वयन गर्नकालागी निर्देशनालयले प्रस्ताव मागेको छ ।