ओखलढुंगाको जिसस प्रमुखमा कांग्रेस उम्मेदवार निर्विरोध

कार्तिक ३, सोलुखुम्बु । ओखलढुंगा जिल्ला समन्वय समितिको प्रमुखमा नेपाली कांग्रेसका उम्मेदवार टेकराज भट्टराई निर्विरोध निर्वाचित हुनुभएको छ । कांग्रेसको एकल बहुमत रहेको समितिको सभापतिमा पुराना नेता टेकराज भट्टराई निर्विरोध निर्वाचित हुनुभएको हो । भट्टराई पञ्चायत कालबाटै शिक्षकको जागिर छाडेर राजनीतिमा लागेका पुराना नेता हुनुहुन्छ । २०७४ को स्थानीय चुनावमा चिशंखुगढी गाउँपालिमा अध्यक्षको टिकट पाउनुभएको थियो ।

त्यसबेला पराजित भएपछि उहाँ २०७९ मा वडा सदस्य उम्मेदवार बनेर जित्नुभएको थियो । समन्वय समितिमा सभापति निर्वाचित डिल्लीराम खनालको निधनपछि एक बर्षदेखि सभापति खाली थियो । कोशी प्रदेश कार्यसमितिले जिल्लाबाट पठाएका तीन जनाको नामबाट सर्वसम्मत भट्टराईलाई छनौट गरेको ओखलढुंगा कांग्रेसले जनाइएको छ । समन्वयमा ८ स्थानीय तहका प्रमुख र उपप्रमुखको गरि १६ मत रहेको छ ।

यसमध्ये कांग्रेसको एक्लै ९ र अन्य दलहरूको गरी ७ रहेको छ । नेपाली कांग्रेसका उम्मेदवारलाई निर्विरोध निर्वाचित गराउन अहं भूमिका निर्वाह गरेका अन्य राजनीतिक दल एवं सम्पूर्ण जनप्रतिनिधिहरुलाई नेपाली कांग्रेस केन्द्रीय कार्यालय धन्यवाद व्यक्त गरेको छ ।