विकास निर्माणमा सेनाको भूमिका प्रशंसनीय रहेको रक्षामन्त्री राईको भनाई

मसिंर ४, सोलुखुम्बु । रक्षामन्त्री मानवीर राईले विकास निर्माणमा नेपाली सेनाको भूमिका प्रशंसनीय रहेको बताउनुभएको छ । मंगलवार रक्षा मन्त्रालयको चौमासिक प्रगति समिक्षा एवं मन्त्रालयस्तरीय विकास समस्या समाधान समितिको बैठकमा उहाँले यस्तो बताउनुभएकोे हो ।

उहाँले नेपाली सेनाले फास्ट ट्र्याक, करिडोर निर्माण, विश्वविद्यालय निर्माण, चुरे संरक्षणका साथै विपद्‍मा राहत र उद्धारका कार्यसमेत गरिरहेको बताउनुभयो । हाल नेपाली सेनाले तातोपानी क्षेत्रमा बेलीब्रिजहरू बनाइरहेको मन्त्री राईको भनाई छ ।

उहाँले सिमिकोटमा तत्काल बाटो जोड्न भौतिक पूर्वाधार तथा यातायात मन्त्रालयबाट जिम्मेवारी दिइएको उल्लेख गर्दै सेनाको नेतृत्वमा रक्षा मन्त्रालयले उक्त काम गरिरहेको बताउनुभएको छ ।

उहाँले काठमाडौँ–तराई मधेस जोड्ने दु्रतमार्गमा खोकना क्षेत्रमा देखिएका समस्या समाधान पूर्णरुपले नभइसकेको उल्लेख गर्दै छिटै भौगोलिक निरीक्षण गरेर निस्कर्षमा पुग्ने बताउनुभयो ।